កាលពីថ្ងៃព្រហស្បតិ៍ម្សិលមិញ សហរដ្ឋអាមេរិក បានចាប់ផ្តើមជាផ្លូវការការពង្រីកមូលដ្ឋានយោធាដ៏សំខាន់នៅឆកសមុទ្រ Manda ស្ថិតក្នុងប្រទេសកេនយ៉ា ដើម្បីជំរុញទំនាក់ទំនងសន្និសុខជាមួយប្រទេសមួយនេះ នៅក្នុងតំបន់យុទ្ធសាស្រ្តដ៏ចាំបាច់ ។

អនុរដ្ឋមន្រ្តីក្រសួងការបរទេសសហរដ្ឋអាមេរិកលោក Christopher Landau បានបើកគ្រឿងចក្រកាយដី ដែលជានិមិត្តសញ្ញាផ្លូវការនៃការចាប់ផ្តើមគម្រោង ជាមួយក្រុមមន្រ្តីយោធាជាន់ខ្ពស់សហរដ្ឋអាមេរិក និងក្រុមមន្រ្តីយោធាកេនយ៉ា ។

លោក Landau និយាយថា ពួកយើងត្រូវតែបង្ហាញអ្នកដែលចង់វាយប្រហារពួកយើងថា ពួកយើងបានដោះស្រាយ ដើម្បីការពារខ្លួនឯង ហើយប៉ុស្តិ៍ខាងក្រៅមួយនេះ តំណាងឲ្យការប្តេជ្ញាចិត្តជាក់ស្តែងចំពោះវិស័យការពារជាតិរវាងសហរដ្ឋអាមេរិក និងកេនយ៉ា ដែលលោកគិតថា វានឹងផ្ញើរសារខ្លាំងបំផុតមួយដល់អ្នកដែលចង់ធ្វើជាសត្រូវរបស់ពួកយើង ។

ការពង្រីកមូលដ្ឋានទ័ពនេះ នឹងអនុញ្ញាតឲ្យយន្តហោះខ្នាតធំជាងមុន ប្រតិបត្តិការចេញពីមូលដ្ឋានទ័ព ដែលរដ្ឋាភិបាលទាំង ២ និយាយថា វានឹងជំរុញការត្រៀមខ្លួនប្រយុទ្ធប្រឆាំងអំពើភេរវកម្ម និងពង្រឹងសន្តិសុខសមុទ្ររួមគ្នា នៅតាមតំបន់អាហ្វ្រិកឦសាន ។

ឆកសមុទ្រ Mandaដែលជាមូលដ្ឋានកងទ័ពការពារជាតិកេនយ៉ាមានទាហានសហរដ្ឋាមេរិកឈរជើងនោះ បានបម្រើជាយូរមកហើយជាទីតាំងប្រតិបត្តិការឆ្ពោះទៅមុខ សម្រាប់ប្រតិបត្តិការដែលមានគោលដៅលើក្រុមជ្រុលនិយម នៅប្រទេសសូម៉ាលី និងនៅទូទាំងតំបន់ ៕