ក្រោយរយៈពេល ១៨ឆ្នាំជាគ្រូបង្រៀននៅសាលារៀនគ្រប់គ្រងដោយទីភ្នាក់ងារជនភៀសខ្លួនប៉ាឡេស្ទីនអង្គការសហប្រជាជាតិ( UNRWA) អ្នកស្រី Maryam Shaaban ស្ថិតនៅក្នុងចំណោមបុគ្គលិក ៦០០នាក់ ត្រូវបានគេបណ្តេញចេញពីការងាររបស់ពួកគេនៅតំបន់ហ្កាហ្សា ហើយនិងជាផលប៉ះពាល់ចុងក្រោយគេនៅក្នុងសង្រ្គាមប្រល័យពូជសាសន៍របស់អ៊ីស្រាអែលនៅតំបន់ឡោមព័ទ្ធមួយនេះ ។

កាលពីដើមខែមករា ទីភ្នាក់ងារ UNRWA បានប្រកាសវិធានការតឹងរ៉ឹងជាច្រើន រួមទាំងការកាត់បន្ថយប្រាក់ខែគោលចំនួន ២០ភាគរយ សម្រាប់បុគ្គលិកក្នុងស្រុកនៅតំបន់ហ្កាហ្សា កាត់បន្ថយម៉ោងការងារ និងបញ្ចប់កិច្ចសន្យាសម្រាប់និយោជិកដែលមានមូលដ្ឋាននៅក្រៅតំបន់ហ្កាហ្សា ដែលបានសុំឈប់សម្រាក ។

យោងតាមលិខិតមួយច្បាប់ផ្ញើរជូនបុគ្គលិករងផលប៉ះពាល់ដោយអគ្គស្នងការទីភ្នាក់ងារ UNRWA លោក Philippe Lazzarini បានឲ្យដឹងថា ទីភ្នាក់ងារមួយនេះ និយាយថា ពួកគេបង្ខំចាត់វិធានការ ដោយសារកង្វះខាតហិញ្ញវត្ថុធ្ងន់ធ្ងរ នៅក្នុងថវិការឆ្នាំ ២០២៦របស់ខ្លួនចំនួន ២២០លានដុល្លារ ។

ឱនភាពនេះ នឹងគំរាមកំហែងដល់លទ្ធភាពរបស់ទីភ្នាក់ងារ ក្នុងការឈានដល់កាតព្វកិច្ចប្រតិបត្តិការស្នូល រួមទាំងប្រាក់ខែគោលរបស់បុគ្គលិក ហើយនិងការបន្តកម្មវិធីមនុស្សធម៌សំខាន់ៗ ។

អ្នកស្រី Shaaban វ័យ ៥២ឆ្នាំ ដែលបច្ចុប្បន្នបានជម្លៀសខ្លួននៅប្រទេសអេហ្ស៊ីបជាមួយប្តីរងរបួសរបស់គាត់ បានចាប់ផ្តើមធ្វើការជាមួយទីភ្នាក់ងារ UNមួយនេះ កាលពីឆ្នាំ ២០០៧ ជាគ្រូបង្រៀននៅសាលារៀនមួយកន្លែង ស្ថិតក្នុងទីក្រុង Jabalia នៅភាគខាងជើងតំបន់ហ្កាហ្សា ។

ដូចគ្នានឹងពលរដ្ឋផ្សេងទៀតដែរនៅក្នុងតំបន់ហ្កាហ្សា អ្នកស្រីរងគ្រោះ អំឡុងសង្រ្គាមប្រល័យពូជសាសន៍របស់អ៊ីស្រាអែល ។ អ្នកស្រីបានជម្លៀសខ្លួនជាមួយគ្រួសាររបស់គាត់ចេញពីទីក្រុង Jabalia ទៅកាន់ទីក្រុង Nuseirat ស្ថិតនៅភាគកណ្តាលតំបន់ហ្កាហ្សា ជាទីដែលពួកគេជ្រកកោនបណ្តោះអាសន្ននៅផ្ទះប្អូនប្រុសរបស់គាត់ ។ 

ប៉ុន្តែនៅខែធ្នូ ឆ្នាំ ២០២៣ ពួកគេរងគ្រោះដោយផ្ទាល់ពីការវាយប្រហារតាមច្រកអាកាសរបស់អ៊ីស្រាអែល ដែលបានសម្លាប់មនុស្ស ១៥នាក់ និងមនុស្សរាប់សិបនាក់ផ្សេងទៀត រងរបួស ។ នៅក្នុងចំណោមជនរងគ្រោះទាំងអស់ គឺជាកូនស្រីវ័យ ២២ឆ្នាំរបស់អ្នកស្រី Maryam ប្អូនប្រុសរបស់គាត់ និងគ្រួសារទាំងមូលរបស់គាត់ ៕