​

ប្រធានាធិបតី Donald Trump កាលពីថ្ងៃសុក្រ (ទី៣០ ខែមករា) បានបង្ហាញពីការរំពឹងទុកថា អ៊ីរ៉ង់នឹងស្វែងរកការចរចាឲ្យមានកិច្ចព្រមព្រៀង ជាជាងប្រឈមនឹងវិធានការយោធារបស់អាមេរិក ទោះបីជាទីក្រុងតេអេរ៉ង់ បានព្រមានថា ឃ្លាំងអាវុធមីស៊ីលរបស់ខ្លួន នឹងមិនដែលស្វះស្វែងរកការពិភាក្សាគ្នាក៏ដោយ។

លោក Trump បានប្រាប់អ្នកសារព័ត៌មាននៅក្នុងការិយាល័យប្រធានាធិបតី Oval Office ថា៖ «ខ្ញុំអាចនិយាយបែបនេះបាន ពួកគេពិតជាចង់ធ្វើកិច្ចព្រមព្រៀងមែន»។ នៅពេលត្រូវបានសួរថា តើលោកបានផ្តល់ថ្ងៃផុតកំណត់ដល់អ៊ីរ៉ង់ ដើម្បីឲ្យចូលចរចា ជុំវិញកម្មវិធីនុយក្លេអ៊ែរ និងមីស៊ីលរបស់ខ្លួនដែរ ឬទេ លោកបានឆ្លើយតបថា «មែនហើយ ខ្ញុំបានធ្វើ» ប៉ុន្តែលោកបានបដិសេធមិននិយាយថា វាជាអ្វីនោះឡើយ។

ជាមួយគ្នានេះ ដោយសំដៅទៅលើក្រុមនាវាផ្ទុកយន្តហោះកងទ័ពជើងទឹកអាមេរិក នៅក្នុងដែនទឹក ម្ដុំប្រទេសអ៊ីរ៉ង់ លោក Trump បានបន្ថែមថា៖ «យើងមានកងនាវាចម្បាំងធំមួយ កំពុងឆ្ពោះទៅកាន់អ៊ីរ៉ង់ឥឡូវនេះ។ សង្ឃឹមថា យើងនឹងធ្វើកិច្ចព្រមព្រៀង។ ប្រសិនបើយើងធ្វើកិច្ចព្រមព្រៀងមែន នោះជារឿងល្អ។ ប្រសិនបើយើងមិនធ្វើកិច្ចព្រមព្រៀងទេ យើងនឹងរង់ចាំមើលថា តើមានអ្វីកើតឡើង»។

លោក Trump បានលើកឡើងពីអ្វីដែលលោកបាននិយាយថា ជាការសម្រេចចិត្តរបស់អ៊ីរ៉ង់ ក្នុងការបញ្ឈប់ការប្រហារជីវិតក្រុមបាតុករ បន្ទាប់ពីការបង្ក្រាបដែលក្រុមសិទ្ធិមនុស្សនិយាយថា មនុស្សជាង ៦.០០០នាក់ ត្រូវបានសម្លាប់ ជាភស្តុតាង ដើម្បីបង្ហាញថា ទីក្រុងតេអេរ៉ង់ត្រៀមខ្លួនរួចជាស្រេច ដើម្បីចរចា។

សម្ព័ន្ធមិត្តរបស់ទីក្រុងវ៉ាស៊ីនតោន នៅក្នុងតំបន់ មានក្ដីបារម្ភយ៉ាងខ្លាំងថា ការវាយប្រហារណាមួយរបស់សហរដ្ឋអាមេរិកលើអ៊ីរ៉ង់ អាចបង្កឲ្យមានអស្ថិរភាព និងភាពវឹកវរផ្នែកសេដ្ឋកិច្ច៕