ក្រុមបាតុកររាប់ពាន់នាក់បានចេញមកតាមដងផ្លូវ នៅទីក្រុង Minneapolis ហើយសិស្សនិស្សិតទូទាំងសហរដ្ឋអាមេរិក បានចេញមកធ្វើបាតុកម្ម កាលពីថ្ងៃសុក្រ (ទី៣០ ខែមិថុនា) ដើម្បីទាមទារឲ្យដកភ្នាក់ងារអន្តោប្រវេសន៍សហព័ន្ធចេញពីរដ្ឋ Minnesota បន្ទាប់ពីមានការបាញ់ប្រហារដ៏សាហាវលើពលរដ្ឋអាមេរិក ២នាក់។

សិស្សនិស្សិត និងគ្រូបង្រៀនបានទុកថ្នាក់រៀនចោល រាប់ពីរដ្ឋ California រហូតដល់ New York នៅថ្ងៃតវ៉ាជាតិ ដែលបានកើតឡើងស្របពេលមានសារចម្រុះពីរដ្ឋបាលរបស់លោកប្រធានាធិបតី Donald Trump អំពីថា តើខ្លួននឹងបន្ថយប្រតិបត្តិការ Metro Surge ដែរ ឬយ៉ាងណា។

ក្រោមការបង្ក្រាបអន្តោប្រវេសន៍ជាតិ លោក Trump បានបញ្ជូនមន្ត្រីសហព័ន្ធចំនួន ៣.០០០នាក់ ទៅកាន់តំបន់ Minneapolis ដែលកំពុងល្បាតតាមដងផ្លូវក្នុងឈុតយុទ្ធសាស្ត្រ ជាកម្លាំងដែលមានទំហំធំជាងនាយកដ្ឋាននគរបាល Minneapolis ៥ដង។

ដើម្បីតវ៉ាប្រឆាំងនឹងការកើនឡើង និងយុទ្ធសាស្ត្រដែលប្រើប្រាស់ដោយទីភ្នាក់ងារអនុវត្តច្បាប់អន្តោប្រវេសន៍ និងគយ (ICE) របស់សហរដ្ឋអាមេរិក មនុស្សរាប់ពាន់នាក់បានប្រមូលផ្តុំគ្នា នៅទីក្រុង Minneapolis ក្នុងសីតុណ្ហភាពក្រោមសូន្យ ដែលរួមមានគ្រួសារដែលមានកូនតូចៗ គូស្វាមីភរិយាវ័យចំណាស់ និងសកម្មជនសហគមន៍វ័យក្មេង។

នៅក្នុងតំបន់ Minneapolis ជិតកន្លែងដែលលោក Alex Pretti និងនាង Renee Good ដែលជាពលរដ្ឋអាមេរិក ២នាក់ ត្រូវបានបាញ់សម្លាប់នៅខែនេះ ដោយភ្នាក់ងារអន្តោប្រវេសន៍សហព័ន្ធ គ្រូបង្រៀន និងបុគ្គលិកប្រហែល ៥០នាក់ មកពីសាលារៀនមូលដ្ឋានបានចេញមកដើរដង្ហែក្បួនតវ៉ា។

ប្រតិកម្មប្រឆាំងនឹងគោលនយោបាយអន្តោប្រវេសន៍របស់រដ្ឋបាលនេះ បានគំរាមកំហែងដល់ការបិទរដ្ឋាភិបាលអាមេរិកដោយផ្នែក ខណៈដែលពួកគណបក្សប្រជាធិបតេយ្យ នៅក្នុងសភា បានប្រឆាំងនឹងការផ្តល់មូលនិធិដល់ក្រសួងសន្តិសុខមាតុភូមិដែលត្រួតពិនិត្យ ICE៕