លោកប្រធានាធិបតី Vladimir Putin បានសរសើរកំណត់ត្រានាំចេញឧស្សាហកម្មយោធារបស់រុស្ស៊ី កាលពីថ្ងៃសុក្រ (ទី៣០ ខែមករា) ដោយនិយាយថា ប្រទេសបានពង្រីកទីផ្សារ និងទស្សនវិស័យរបស់ខ្លួន ជាពិសេសនៅតំបន់អាហ្វ្រិក ទោះបីជាមានសម្ពាធពីលោកខាងលិចក៏ដោយ។

លោក Putin បានប្រាប់កិច្ចប្រជុំ ស្តីពីកិច្ចសហប្រតិបត្តិការបច្ចេកទេសយោធា នៅវិមានក្រឹមឡាំង ក្នុងវីដេអូមួយថា៖ «កាលពីឆ្នាំមុន ការផលិតគ្រឿងយុទ្ធោបករណ៍របស់រុស្ស៊ីត្រូវបានផ្គត់ផ្គង់ដល់ប្រទេសជាង ៣០ ហើយចំនួនប្រាក់ចំណូលប្តូរប្រាក់បរទេសលើសពី ១៥ពាន់លានដុល្លារ»។ លោកបានបញ្ជាក់ថា វិស័យនេះកំពុងដំណើរការក្នុង «ស្ថានភាពដ៏ស្មុគស្មាញ»។

លោកបានបន្តថា៖ «សម្ពាធពីប្រទេសលោកខាងលិចនៅតែមាន ហើយថែមទាំងត្រូវបានពង្រឹង ដើម្បីបន្ថយល្បឿន ឬរារាំងទំនាក់ទំនងអាជីវកម្មជាមួយរុស្ស៊ី។ ប៉ុន្តែទោះបីជាមានការប៉ុនប៉ងទាំងអស់នេះក៏ដោយ ក៏កិច្ចសន្យានាំចេញរបស់យើង ជាទូទៅត្រូវបានគោរពយ៉ាងជាប់លាប់»។

លោក Putin បានបន្ថែមថា ប្រទេសអាហ្វ្រិកកំពុងបង្ហាញចំណាប់អារម្មណ៍ជាពិសេស ចំពោះផលិតកម្មរបស់រុស្ស៊ី។ មេដឹកនាំរុស្ស៊ី បានសង្កត់ធ្ងន់ថា៖ «ទោះបីជាមានសម្ពាធពីលោកខាងលិចក៏ដោយ ក៏ដៃគូអាហ្វ្រិកកំពុងបង្ហាញពីការត្រៀមខ្លួន ដើម្បីពង្រីកទំនាក់ទំនងរបស់ពួកគេ ជាមួយរុស្ស៊ី ក្នុងវិស័យយោធា និងបច្ចេកទេសយោធា»។

រុស្ស៊ីបាននិងកំពុងសាងទំនាក់ទំនងជាមួយប្រទេសអាហ្វ្រិកជាច្រើន ក្នុងនោះរួមទាំងវិស័យសហប្រតិបត្តិការយោធាផងដែរ៕