រដ្ឋាភិបាលអាមេរិក កំពុងឆ្ពោះទៅរកការបិទដោយផ្នែក កាលពីថ្ងៃសុក្រ (ទី៣០ ខែមករា) ខណៈដែលសភា ហាក់ដូចជាមិនអនុម័តកិច្ចព្រមព្រៀង ដែលនឹងបន្តរក្សាប្រតិបត្តិការជាច្រើនឲ្យមានមូលនិធិទ្រទង់លើសពីកាលកំណត់ពាក់កណ្តាលអធ្រាត្រ។

បន្ទាប់ពីការពន្យារពេលជាច្រើនម៉ោង ព្រឹទ្ធសភាសហរដ្ឋអាមេរិក បានអនុម័តកញ្ចប់ចំណាយនេះ ដោយការបោះឆ្នោតពីគណបក្សទាំង២ មានសំឡេង ៧១ ទល់នឹង ២៩។ ប៉ុន្តែសភាតំណាងរាស្ត្រ មិនទាន់បានអនុម័តនៅឡើយទេ ហើយមិនត្រូវបានគេរំពឹងថា នឹងមានដំណើរការបោះឆ្នោត រហូតដល់ថ្ងៃចន្ទ។ នេះបើយោងតាមជំនួយការថ្នាក់ដឹកនាំគណបក្សសាធារណរដ្ឋម្នាក់ ដែលបាននិយាយក្នុងលក្ខខណ្ឌមិនបញ្ចេញឈ្មោះ។

នោះមានន័យថា ការបិទប្រតិបត្តិការរដ្ឋាភិបាលផ្នែកខ្លះ គឺស្ទើរតែប្រាកដណាស់ថា នឹងចាប់ផ្តើមមាននៅម៉ោង ១២:០១នាទីព្រឹក ម៉ោងក្នុងស្រុក (ត្រូវនឹង ៥:០១នាទី ម៉ោងសកល) នាថ្ងៃសៅរ៍នេះ។ ប៉ុន្តែវាអាចមានរយៈពេលខ្លី។ សមាជិកសភាមកពីគណបក្សទាំង២ បាននិងកំពុងធ្វើការ ដើម្បីធានាបានថា ការជជែកវែកញែកលើការអនុវត្តច្បាប់អន្តោប្រវេសន៍មិនរំខានដល់ប្រតិបត្តិការរបស់រដ្ឋាភិបាលផ្សេងទៀតទេ។ 

នេះគឺជាភាពផ្ទុយគ្នាគួរឲ្យកត់សម្គាល់ពីរដូវស្លឹកឈើជ្រុះឆ្នាំមុន នៅពេលដែលគណបក្សសាធារណរដ្ឋ និងប្រជាធិបតេយ្យ បានមានការខ្វែងគំនិតគ្នា ជុំវិញការថែទាំសុខភាព ដែលបណ្តាលឲ្យបិទរដ្ឋាភិបាលដែលមានរយៈពេលជាកំណត់ត្រា ៤៣ថ្ងៃ និងធ្វើឲ្យសេដ្ឋកិច្ចសហរដ្ឋអាមេរិកខាតបង់ប្រមាណ ១១ពាន់លានដុល្លារ។

សមាជិកព្រឹទ្ធសភាបក្សប្រជាធិបតេយ្យ ដែលខឹងសម្បានឹងការបាញ់សម្លាប់ពលរដ្ឋអាមេរិកម្នាក់ទៀតដោយភ្នាក់ងារអន្តោប្រវេសន៍ នៅទីក្រុង Minneapolis កាលពីចុងសប្តាហ៍មុន បានគំរាមផ្អាកកញ្ចប់ថវិកានេះ ជាកិច្ចខិតខំប្រឹងប្រែង ដើម្បីបង្ខំលោកប្រធានាធិបតី Donald Trump ឲ្យគ្រប់គ្រង DHS (ក្រសួងសន្តិសុខមាតុភូមិ) ដែលត្រួតពិនិត្យការអនុវត្តច្បាប់អន្តោប្រវេសន៍សហព័ន្ធ៕