នាយករដ្ឋមន្ត្រី លោក Keir Starmer បាននិយាយកាលពីថ្ងៃសុក្រ (ទី៣០ ខែមករា)ថា ទីក្រុងប៉េកាំងនឹងលុបចោលការរឹតបន្តឹងដែលបានដាក់លើក្រុមសមាជិកសភាអង់គ្លេស ដែលមានន័យថា មន្ត្រីទាំងនោះឥឡូវនេះនឹងមានសេរីភាពក្នុងការធ្វើដំណើរទៅកាន់ប្រទេសចិន។

លោក Starmer បានប្រកាសបែបនេះក្នុងអំឡុងពេលធ្វើទស្សនកិច្ចរយៈពេល ៤ថ្ងៃរបស់លោក នៅប្រទេសចិន ជាការធ្វើដំណើរលើកដំបូងរបស់មេដឹកនាំចក្រភពអង់គ្លេស ក្នុងរយៈពេល ៨ឆ្នាំ ដែលមានគោលបំណងធ្វើឲ្យទំនាក់ទំនងប្រសើរឡើង ទោះបីជាមានក្ដីបារម្ភជាបន្តបន្ទាប់ អំពីចារកម្ម សិទ្ធិមនុស្ស និងបញ្ហាផ្សេងៗទៀតក៏ដោយ។

នាយករដ្ឋមន្ត្រីបានប្រាប់សារប័ត៌មាន BBC ថា លោកបានលើកឡើងពីបញ្ហាសមាជិកសភាដែលត្រូវបានដាក់ទណ្ឌកម្ម ជាមួយប្រធានាធិបតីចិន លោក Xi Jinping ដែលបានឆ្លើយតបថា «ការរឹតបន្តឹងលែងត្រូវបានអនុវត្តទៀតហើយ»។

លោក Starmer បានបញ្ជាក់ថា៖ «លោកប្រធានាធិបតី Xi បានថ្លែងមកកាន់ខ្ញុំ ដែលមានន័យថា សមាជិកសភាទាំងអស់មានសេរីភាពក្នុងការធ្វើដំណើរទៅកាន់ប្រទេសចិន។ អត្ថប្រយោជន៍មួយនៃការមានទំនាក់ទំនងគ្នានេះ គឺមិនត្រឹមតែជាការចាប់យកឱកាសប៉ុណ្ណោះទេ ប៉ុន្តែថែមទាំងជាពេលវេលាដែលអាចលើកឡើងពីបញ្ហាដ៏លំបាក និងរសើបទាំងនោះទៀតផង»។

គួរបញ្ជាក់ថា ក្នុងឆ្នាំ២០២១ ប្រទេសចិនបានដាក់ទណ្ឌកម្មលើជនជាតិអង់គ្លេសចំនួន ៩នាក់ ក្នុងនោះរួមមានទាំងលោក Iain Duncan Smith ដែលជាអតីតមេដឹកនាំគណបក្សអភិរក្សនិយមផងដែរ ដោយចោទប្រកាន់អ្នកទាំងនោះពីបទផ្សព្វផ្សាយនូវអ្វីដែលខ្លួនចាត់ទុកថា ជា «ការនិយាយកុហក និងព័ត៌មានមិនពិត» ពាក់ព័ន្ធនឹងតំបន់ Xinjiang។

តែយ៉ាងណាក្ដី អ្នកនាំពាក្យរបស់លោក Starmer បានឲ្យដឹងថា ចក្រភពអង់គ្លេស នឹងមិនដកទណ្ឌកម្មលើបុគ្គលជាជនជាតិចិន ជាថ្នូរនឹងការលុបការរឹតបន្តឹង លើសមាជិកសភាអង់គ្លេសនោះទេ៕