ទីបញ្ជាការកងទ័ពភូមិភាគខាងត្បូងរបស់ចិន បានប្រកាសឲ្យដឹងថា ប្រទេសចិនបានធ្វើការល្បាតកងទ័ពជើងទឹក និងអាកាស នៅជុំវិញតំបន់ថ្មប៉ប្រះទឹក Scarborough ក្នុងសមុទ្រចិនខាងត្បូង នាថ្ងៃសៅរ៍ (ទី៣១ ខែមករា) នេះ។

តំបន់ថ្មប៉ប្រះទឹកនេះ ស្ថិតនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ប៉ុន្តែចិនក៏អះអាងថា វាគឺជាផ្នែកមួយនៃទឹកដីរបស់ខ្លួនផងដែរ។ ស្ថានទូតហ្វីលីពីន ប្រចាំនៅទីក្រុងប៉េកាំង មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

ការប្រកាសនេះបានបញ្ជាក់ថា ចិនបានបង្កើនការល្បាតត្រៀមខ្លួនប្រយុទ្ធ នៅតំបន់នេះ ក្នុងខែមករា ដោយ «ប្រឆាំងនឹងការបង្កហេតុរំលោភបំពានរបស់ប្រទេសណាមួយ នៅក្នុងរង្វង់តំបន់នេះ»។

កងកម្លាំងប្រដាប់អាវុធរបស់ទីក្រុងម៉ានីល បានឲ្យដឹងកាលពីថ្ងៃអង្គារថា យោធានៃប្រទេសហ្វីលីពីន និងសហរដ្ឋអាមេរិក បានធ្វើសមយុទ្ធរួមគ្នានៅក្នុងតំបន់ថ្មប៉ប្រះទឹក Scarborough កាលពីដើមសប្តាហ៍នេះ ជាសមយុទ្ធបែបនេះលើកទី១១ ចាប់តាំងពីខែវិច្ឆិកា ឆ្នាំ២០២៣៕