សហរដ្ឋអាមេរិក កាលពីថ្ងៃសុក្រ (ទី៣០ ខែមករា) បានអនុម័តការលក់អាវុធតម្លៃរាប់ពាន់លានដុល្លារទៅប្រទេសអ៊ីស្រាអែល ដោយការយល់ព្រមនេះបានកើតឡើងស្របពេលមានភាពតានតឹងខ្ពស់ជាមួយអ៊ីរ៉ង់។

ក្រសួងការបរទេសបានឲ្យដឹងថា ខ្លួនបានយល់ព្រមឲ្យលក់ឧទ្ធម្ភាគចក្រវាយប្រហារ Apache ចំនួន ៣០គ្រឿងតម្លៃ ៣,៨ពាន់លានដុល្លារ ទៅអ៊ីស្រាអែល ដែលបានយល់ព្រមបង្កើតបទឈប់បាញ់ដ៏ផុយស្រួយ នៅក្នុងតំបន់ហ្កាហ្សា។

ក្រសួងការបរទេសបានលើកឡើងនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិកប្តេជ្ញាចិត្ត ចំពោះសន្តិសុខរបស់អ៊ីស្រាអែល ហើយវាមានសារៈសំខាន់ ចំពោះផលប្រយោជន៍ជាតិរបស់សហរដ្ឋអាមេរិក ក្នុងការជួយអ៊ីស្រាអែលអភិវឌ្ឍ និងរក្សាសមត្ថភាពការពារខ្លួនយ៉ាងរឹងមាំ និងត្រៀមខ្លួនរួចជាស្រេច»។ ហើយស្ថាប័ននេះបានបញ្ជាក់បន្ថែមថា៖ «ការលក់ដែលត្រូវបានស្នើឡើងនេះ គឺស្របនឹងគោលបំណងទាំងនោះ»។

នៅក្នុងកញ្ចប់នេះ ក៏មានផងដែរនូវការលក់យានយន្តយុទ្ធសាស្ត្រស្រាលរួមគ្នាចំនួន ១,៨ពាន់លានដុល្លារ។ សហរដ្ឋអាមេរិកបញ្ចូនគ្រឿងយុទ្ធោបករណ៍តម្លៃរាប់ពាន់លានដុល្លារ ក្នុងមួយឆ្នាំ ទៅអ៊ីស្រាអែល ដែលភាគច្រើនជាជំនួយជាងការលក់។

អ៊ីស្រាអែល និងក្រុមហាម៉ាស បានឈានដល់បទឈប់បាញ់ដែលគាំទ្រដោយសហរដ្ឋអាមេរិក កាលពីខែតុលាឆ្នាំមុន ដែលភាគច្រើនបានផ្អាកសង្គ្រាមរយៈពេល ២ឆ្នាំ។ តែភាពតានតឹងចាប់ផ្ដើមមានកម្រិតខ្ពស់ នៅកន្លែងផ្សេងទៀត ក្នុងតំបន់នេះ ខណៈដែលសហរដ្ឋអាមេរិកដាក់ពង្រាយកងកម្លាំងយោធាដ៏ធំ នៅក្នុងដែនទឹកក្បែរអ៊ីរ៉ង់៕