កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បាននិយាយកាលពីថ្ងៃសុក្រថា ខ្លួនកំពុងបង្កើនជំនួយស្បៀងអាហារសម្រាប់ប្រជាជនរាប់ម៉ឺនគ្រួសារដែលត្រូវបានផ្លាស់ទីលំនៅ ដោយសារការបន្តប្រយុទ្ធគ្នា នៅភាគឦសានប្រទេសស៊ីរី។

WFP បាននិយាយថា មនុស្សជាង ១៦៥.000នាក់ បានភៀសខ្លួនចេញពីផ្ទះសម្បែង នៅក្នុងខេត្ត Al-Hasakah ដោយស្វែងរកជម្រកនៅតាមសាលារៀន មជ្ឈមណ្ឌលសមូហភាព និងជំរំដែលមានរបស់របរតិចតួច។ ទីភ្នាក់ងារនេះ កំពុងផ្តល់អាហារចម្អិនរួចជាស្រេច អាហារសម្រន់ អាហារបំប៉ន និងប្រអប់អាហារ នៅក្នុងទីក្រុង Al-Hasakah និង Kobani នៃខេត្តអាឡេប៉ូ និងជំរំ Al Hol ជាកន្លែងដែលខ្លួនមានគោលបំណងផ្គត់ផ្គង់ជំនួយរយៈពេលពីរខែ។

ការផ្លាស់ទីលំនៅនេះ កើតឡើង បន្ទាប់ពីការប៉ះទង្គិចគ្នារវាងកងកម្លាំងប្រជាធិបតេយ្យស៊ីរី (SDF) និងកងកម្លាំងស្មោះត្រង់នឹងអាជ្ញាធរបណ្តោះអាសន្នស៊ីរី។ បទឈប់បាញ់កាលពីដើមសប្តាហ៍នេះ បានអនុញ្ញាតឲ្យមានការវិលត្រឡប់មួយផ្នែក នៅក្នុងទីក្រុងអាឡេប៉ូ ប៉ុន្តែស្ថានភាពនៅក្នុងទីក្រុង Al-Hasakah នៅតែផុយស្រួយ។

លោកស្រី Marianne Ward ប្រធានប្រចាំប្រទេសរបស់ WFP នៅប្រទេសស៊ីរី បានថ្លែងថា៖«សន្តិសុខស្បៀង គឺជាសន្តិសុខជាតិ។ WFP ត្រៀមខ្លួនរួចជាស្រេច ដើម្បីបង្កើនជំនួយតាមតម្រូវការ» ដោយព្រមានថា ការគាំទ្រពីអ្នកផ្តល់ជំនួយ គឺមានសារៈសំខាន់ណាស់ ស្របពេលមានការលំបាកផ្នែកសេដ្ឋកិច្ចរយៈពេលជាច្រើនឆ្នាំមកនេះ៕