ប្រមុខការទូតរបស់អេមីរ៉ាតអារ៉ាប់រួម (UAE)) និងសហរដ្ឋអាមេរិកកាលពីថ្ងៃសុក្រ បានជួបពិភាក្សាគ្នាតាមទូរស័ព្ទ ដើម្បីពិភាក្សាអំពីការវិវត្តក្នុងតំបន់ និងទំនាក់ទំនងទ្វេភាគី។

លោក Sheikh Abdullah bin Zayed Al Nahyan ឧបនាយករដ្ឋមន្ត្រី និងជារដ្ឋមន្ត្រីការបរទេសអេមី     រ៉ាតអារ៉ាប់រួម បាននិយាយជាមួយលោក Marco Rubio រដ្ឋមន្ត្រីការបរទេសអាមេរិក។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន WAM ផ្លូវការរបស់អារ៉ាប់រួម។

សម្រាប់ស្ថានភាពនៅតំបន់ហ្កាហ្សា លោករដ្ឋមន្ត្រីអារ៉ាប់រួម បានសង្កត់ធ្ងន់លើតម្រូវការក្នុងការពង្រឹងជំនួយមនុស្សធម៌ ដល់ជនស៊ីវិល និងបានបញ្ជាក់ជាថ្មីនូវការប្តេជ្ញាចិត្តរបស UAE ចំពោះសន្តិភាព ស្ថិរភាព និងការវិវត្តនៅក្នុងតំបន់។ លោករដ្ឋមន្រ្តីទាំងពីរ ក៏បានពិភាក្សាអំពីសង្គ្រាមស៊ីវិលនៅស៊ូដង់ផងដែរ។ លោក Sheikh Abdullah បានអំពាវនាវឲ្យមានបទឈប់បាញ់ជាបន្ទាន់ និងគ្មានលក្ខខណ្ឌ និងគាំទ្រការផ្លាស់ប្តូរទៅជារដ្ឋាភិបាលស៊ីវិលឯករាជ្យមួយ ដែលគ្មានការគ្រប់គ្រងពីក្រុមដែលកំពុងធ្វើសង្គ្រាម។

សារព័ត៌មាន WAM បានបន្ថែមថា ពួកគេក៏បានពិភាក្សាអំពីការវិវត្តសំខាន់ៗ ក្នុងតំបន់ផងដែរ ដោយមិនបានផ្តល់ព័ត៌មានលម្អិតបន្ថែមទេ។

ការអំពាវនាវនេះ បានកើតឡើង ចំពេលមានភាពតានតឹងរវាងសហរដ្ឋអាមេរិក និងអ៊ីរ៉ង់ កាន់តែខ្លាំង    ឡើង។ ប្រធានាធិបតីអាមេរិក លោក ដូណាល់ ត្រាំ បាននិយាយថា៖«កងនាវាចម្បាំងដែលមានកម្លាំងដ៏លើសលប់» ដឹកនាំដោយនាវាផ្ទុកយន្តហោះ Abraham Lincoln កំពុងធ្វើដំណើរឆ្ពោះទៅកាន់ប្រទេស    អ៊ីរ៉ង់ ដោយព្រមានថា «ពេលវេលាជិតអស់ហើយ» សម្រាប់ទីក្រុងតេអេរ៉ង់ ដើម្បីឈានដល់កិច្ចព្រមព្រៀងជាមួយទីក្រុងវ៉ាស៊ីនតោន។ កាលពីថ្ងៃសុក្រ លោក ត្រាំ បានបញ្ជាក់ថា លោកបានកំណត់ថ្ងៃឱសានវាទ សម្រាប់ប្រទេសអ៊ីរ៉ង់ និងបានទំនាក់ទំនងដោយផ្ទាល់ទៅកាន់ទីក្រុងតេអេរ៉ង់៕