យោងតាមក្រុមអាជ្ញាធរមូលដ្ឋាន មនុស្សយ៉ាងហោចណាស់៣២នាក់បានស្លាប់ក្នុងរលកនៃការវាយប្រហារតាមអាកាសរបស់អ៊ីស្រាអែលនៅទូទាំងតំបន់ហ្កាហ្សាកាលពីថ្ងៃសៅរ៍៣១មករា។ 

ទីភ្នាក់ងារការពារជនស៊ីវិល ដែលដំណើរការដោយក្រុមហាម៉ាស បាននិយាយថា កុមារ និងស្ត្រីស្ថិតក្នុងចំណោមអ្នកដែលត្រូវបានសម្លាប់។ ក្រុមនេះបានបន្ថែមថា នៅក្នុងការវាយប្រហារមួយ ឧទ្ធម្ភាគចក្រប្រដាប់អាវុធបានវាយប្រហារតង់មួយដែលផ្តល់ជម្រកដល់ប្រជាជនភៀសខ្លួននៅក្នុងទីក្រុង Khan Younis ភាគខាងត្បូង។

ប្រជាជនប៉ាឡេស្ទីនបានហៅការវាយប្រហារទាំងនេះថាជាការវាយប្រហារដ៏ធ្ងន់ធ្ងរបំផុតចាប់តាំងពីដំណាក់កាលទីពីរនៃបទឈប់បាញ់សម្របសម្រួលដោយលោកប្រធានាធិបតី Trump ក្នុងខែតុលា២០២៥ បានចូលជាធរមានកាលពីដើមខែមករា២០២៦នេះ។

យោធាអ៊ីស្រាអែលបានបញ្ជាក់ថា ការវាយប្រហារមួយចំនួនត្រូវបានធ្វើឡើងដើម្បីឆ្លើយតបទៅនឹងអ្វីដែលខ្លួនបាននិយាយថា ជាការរំលោភលើកិច្ចព្រមព្រៀងរបស់ក្រុមហាម៉ាសកាលពីថ្ងៃសុក្រ។

ទាំងអ៊ីស្រាអែល ទាំងក្រុមហាម៉ាស បានចោទដាក់គ្នាថាបានរំលោភលើបទឈប់បាញ់ចាប់តាំងពីចូលជាធរមានកាលពីឆ្នាំមុន។ 

ក្រុមហាម៉ាសបានថ្កោលទោសការវាយប្រហារទាំងនេះ និងបានជំរុញឱ្យសហរដ្ឋអាមេរិកចាត់វិធានការជាបន្ទាន់ ដោយបន្ថែមថា ការរំលោភបំពានដែលកំពុងបន្តទាំងនេះ បញ្ជាក់ថារដ្ឋាភិបាលអ៊ីស្រាអែលនៅតែបន្តសង្គ្រាមប្រល័យពូជសាសន៍ដ៏ឃោរឃៅរបស់ខ្លួនប្រឆាំងនឹងដែនដីនេះដដែល៕