មន្ត្រីសន្តិសុខជាតិជាន់ខ្ពស់របស់អ៊ីរ៉ង់បាននិយាយថា ការរៀបចំសម្រាប់ការចរចាជាមួយសហរដ្ឋអាមេរិកកំពុងមានវឌ្ឍនភាព ខណៈភាពតានតឹងកើនឡើងក្នុងតំបន់ឈូងសមុទ្រ ស្របពេលមានការបង្កើនសកម្មភាពយោធាពីសំណាក់ទីក្រុងវ៉ាស៊ីនតោននៅក្នុងតំបន់។

លោក Ali Larijani ប្រធានក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃសៅរ៍ថា មិនដូចបរិយាកាសសង្គ្រាមប្រព័ន្ធផ្សព្វផ្សាយសិប្បនិម្មិតទេ ការបង្កើតរចនាសម្ព័ន្ធសម្រាប់ការចរចាកំពុងរីកចម្រើន។ 

ការបង្ហោះរបស់លោក Larijani ពុំបានផ្តល់ព័ត៌មានលម្អិតបន្ថែមអំពីក្របខ័ណ្ឌគោលដែលបានអះអាងសម្រាប់ការចរចានោះទេ។

ទន្ទឹមនឹងនេះ ប្រធានាធិបតីអាមេរិក លោក Donald Trump បាននិយាយថា លោកជឿថាអ៊ីរ៉ង់ចង់ធ្វើកិច្ចព្រមព្រៀងជាជាងប្រឈមនឹងសកម្មភាពយោធា។

លោកបានប្រាប់ទូរទស្សន៍ Fox News ថា អ៊ីរ៉ង់កំពុង និយាយជាមួយពួកលោក ហើយពួកលោកនឹងមើលថាតើពួកលោកអាចធ្វើអ្វីមួយបានឬអត់។ បើមិនដូច្នោះទេ ពួកលោកនឹងមើលឃើញថាមានរឿងអ្វីកើតឡើង ពួកលោកមានកងនាវាធំមួយ កំពុងធ្វើដំណើរទៅទីនោះ។លោកបានបន្ថែមថា ពួកគេកំពុងចរចា។

ភាពតានតឹងបានកើនឡើងរវាងអ៊ីរ៉ង់ និងសហរដ្ឋអាមេរិកអស់រយៈពេលជាច្រើនសប្តាហ៍មកហើយ ស្របពេលមានការគំរាមកំហែងម្តងហើយម្តងទៀតរបស់លោក Trump វាយប្រហារប្រទេសនេះ ជុំវិញការបង្ក្រាបលើការតវ៉ាប្រឆាំងនឹងរដ្ឋាភិបាលថ្មីៗនេះ និងការជំរុញរបស់លោកដើម្បីកាត់បន្ថយកម្មវិធីនុយក្លេអ៊ែរអ៊ីរ៉ង់៕