ក្រុមអាជ្ញាធរពួកឧទ្ទាមបាននិយាយកាលពីថ្ងៃសៅរ៍ ៣១ មករាថា បំណាក់ដីកាលពីដើមសប្តាហ៍នេះបានបណ្ដាលឱ្យអណ្តូងរ៉ែជាច្រើននៅទីតាំងរ៉ែកូលតានដ៏សំខាន់មួយនៅភាគខាងកើតប្រទេសកុងហ្គោបាក់រលំ ដោយបណ្តាលឱ្យមនុស្សយ៉ាងហោចណាស់២០០ នាក់ស្លាប់ ។

លោក Lumumba Kambere Muyisa អ្នកនាំពាក្យរបស់អភិបាលខេត្ត North-Kivu ដែលត្រូវបានតែងតាំងដោយពួកឧទ្ទាមបានប្រាប់សារព័ត៌មាន APថា ការបាក់រលំនេះបានកើតឡើងកាលពីថ្ងៃពុធនៅអណ្តូងរ៉ែ Rubaya ដែលត្រូវបានគ្រប់គ្រងដោយពួកឧទ្ទាម M23 ។ 

រដ្ឋាភិបាលកុងហ្គោនៅក្នុងសេចក្តីថ្លែងការណ៍មួយលើបណ្ដាញសង្គម X បានសម្តែងសាមគ្គីភាពជាមួយក្រុមគ្រួសារជនរងគ្រោះ និងបានចោទប្រកាន់ពួកឧទ្ទាមពីបទកេងប្រវ័ញ្ចធនធានធម្មជាតិរបស់តំបន់ដោយខុសច្បាប់ និងមិនមានសុវត្ថិភាព។

លោក Muyisa បាននិយាយថា បំណាក់ដីនេះបណ្តាលមកពីភ្លៀងធ្លាក់ខ្លាំង។

អ្នកនាំពាក្យរូបនេះ បាននិយាយថា សម្រាប់ពេលនេះ មានអ្នកស្លាប់ជាង២០០ នាក់ ខណៈអ្នកមួយចំនួននៅតែស្ថិតនៅក្នុងវាលល្បប់ ហើយមិនទាន់ត្រូវបានសង្គ្រោះនៅឡើយទេ។

លោកបានបន្ថែមថា មនុស្សជាច្រើនទៀតបានរងរបួស និងត្រូវបានបញ្ជូនទៅមណ្ឌលសុខភាពចំនួនបីនៅក្នុងទីក្រុង Rubaya ខណៈរថយន្តសង្គ្រោះបន្ទាន់ បានបញ្ជូនអ្នករងរបួសទៅកាន់ទីក្រុង Goma ដែលនៅជិតបំផុតមានចម្ងាយប្រហែល៥០គីឡូម៉ែត្រ៕