លោកប្រធានាធិបតីអាមេរិក Donald Trump បាននិយាយកាលពីថ្ងៃអាទិត្យថា លោកសង្ឃឹមថានឹងយល់ព្រមលើកិច្ចព្រមព្រៀងជាមួយអ៊ីរ៉ង់ បន្ទាប់ពីមេដឹកនាំកំពូលរបស់ប្រទេសនេះបានព្រមានថា ការវាយប្រហារណាមួយរបស់សហរដ្ឋអាមេរិកលើអ៊ីរ៉ង់នឹងបង្កឱ្យមានសង្គ្រាមក្នុងតំបន់។

ពេលសួរអំពីការព្រមានរបស់លោក Ali Khamenei លោក Trump បានប្រាប់ក្រុមអ្នកសារព័ត៌មានថា “ជាការពិតណាស់ លោកនឹងនិយាយដូច្នេះ”។លោកសង្ឃឹមថាពួកលោកនឹងធ្វើកិច្ចព្រមព្រៀងមួយ។ ប្រសិនបើពួកលោកមិនធ្វើកិច្ចព្រមព្រៀងទេ នោះនឹងដឹងថាអ្វីដែលលោកនិយាយត្រូវឬអត់។

សហរដ្ឋអាមេរិកបានបង្កើនវត្តមានកងទ័ពជើងទឹករបស់ខ្លួននៅមជ្ឈិមបូព៌ា បន្ទាប់ពីលោក Trump បានគំរាមម្តងហើយម្តងទៀតពីការធ្វើអន្តរាគមន៍នៅអ៊ីរ៉ង់ ប្រសិនបើប្រទេសនេះមិនយល់ព្រមលើកិច្ចព្រមព្រៀងនុយក្លេអ៊ែរ ឬបរាជ័យក្នុងការបញ្ឈប់ការសម្លាប់អ្នកតវ៉ា។

ការតវ៉ា ដែលបានចាប់ផ្តើមកាលពីចុងខែធ្នូ ២០២៥ កន្លងទៅដោយសារតែការលំបាកផ្នែកសេដ្ឋកិច្ច ប៉ុន្តែបានប្រែក្លាយជាបញ្ហាប្រឈមនយោបាយដ៏ធ្ងន់ធ្ងរបំផុតចំពោះសាធារណរដ្ឋអ៊ីស្លាមមួយនេះ ចាប់តាំងពីការបង្កើតប្រទេសក្នុងឆ្នាំ ១៩៧៩ ឥឡូវនេះបានធូរស្រាលក្រោយការគាបសង្កត់ពីអាមេរិក។ 

តួលេខផ្លូវការបានបង្ហាញថា ចំនួនអ្នកស្លាប់ទាក់ទងនឹងភាពចលាចលមានចំនួន ៣.១១៧ នាក់ ខណៈក្រុមសិទ្ធិមនុស្ស HRANA មានមូលដ្ឋាននៅអាមេរិក បាននិយាយកាលពីថ្ងៃអាទិត្យថា ខ្លួនបានផ្ទៀងផ្ទាត់ការស្លាប់របស់មនុស្សចំនួន ៦.៧១៣នាក់។ 

លោក Khamenei បាននិយាយកាលពីថ្ងៃអាទិត្យថា ប្រសិនបើអាមេរិកវាយប្រហារអ៊ីរ៉ង់ នោះនឹងក្លាយជាជម្លោះក្នុងតំបន់។ លោកបានប្រៀបធៀបការតវ៉ាទៅនឹង "រដ្ឋប្រហារ" ដែលគាំទ្រដោយអាមេរិក និងអ៊ីស្រាអែល ដោយនិយាយថា គោលដៅនៃ "ការបះបោរ" គឺដើម្បីវាយប្រហារមជ្ឈមណ្ឌលនានាដែលគ្រប់គ្រងប្រទេសនេះ៕