អ៊ីស្រាអែល បាននិយាយថា ច្រកព្រំដែនដ៏សំខាន់របស់ដែនដីហ្កាហ្សា គឺច្រកឆ្លងកាត់រ៉ាហ្វា (Rafah) នឹងបើកឡើងវិញសម្រាប់ប្រជាជនប៉ាឡេស្ទីននៅថ្ងៃចន្ទ ទី២ ខែកុម្ភៈ នេះ ដោយការរៀបចំកំពុងតែដំណើរការនៅច្រកទ្វារដ៏សំខាន់នៃតំបន់រងការបំផ្លិចបំផ្លាញដោយសង្គ្រាម ដែលត្រូវបានបិទអស់ជិត ២ឆ្នាំមកហើយ ស្របពេលដែលពលរដ្ឋហ្កាហ្សាប្រមាណ ២ម៉ឺននាក់ ដែលសុទ្ធសឹងតែជាអ្នកជំងឺ ត្រៀមខ្លួនសម្រាប់ការចាកចេញទៅព្យាបាល។

មុនពេលសង្គ្រាម ច្រកឆ្លងកាត់រ៉ាហ្វា នៃតំបន់ហ្កាហ្សាជាមួយប្រទេសអេហ្ស៊ីប គឺជាចំណុចចេញចូលដោយផ្ទាល់តែមួយគត់សម្រាប់ប្រជាជនហ្កាហ្សាភាគច្រើន ដើម្បីទៅដល់ពិភពខាងក្រៅ ក៏ដូចជាចំណុចចូលសំខាន់សម្រាប់ជំនួយទៅក្នុងទឹកដីនេះ។ ច្រករ៉ាហ្វាត្រូវបានបិទភាគច្រើន ចាប់តាំងពីខែឧសភា ឆ្នាំ២០២៤មក និងស្ថិតនៅក្រោមការគ្រប់គ្រងរបស់យោធាអ៊ីស្រាអែល នៅខាងហ្កាហ្សា។

អង្គភាពយោធាអ៊ីស្រាអែល COGAT ដែលត្រួតពិនិត្យការសម្របសម្រួលមនុស្សធម៌ បាននិយាយកាលពីថ្ងៃអាទិត្យថា ច្រកឆ្លងកាត់នេះនឹងបើកឡើងវិញក្នុងទិសដៅទាំងពីរសម្រាប់ប្រជាជនហ្កាហ្សាដោយថ្មើរជើងតែប៉ុណ្ណោះ ហើយប្រតិបត្តិការរបស់ច្រកព្រំដែនមួយនេះ នឹងត្រូវបានសម្របសម្រួលជាមួយអេហ្ស៊ីប និងសហភាពអឺរ៉ុប។ អាជ្ញាធរសុខាភិបាលប៉ាឡេស្ទីន បាននិយាយថា មានអ្នកជំងឺចំនួន ២០.០០០នាក់ កំពុងរង់ចាំចាកចេញពីហ្កាហ្សា។

អ៊ីស្រាអែលបាននិយាយថា ច្រករ៉ាហ្វានឹងបើកក្រោមការត្រួតពិនិត្យសន្តិសុខយ៉ាងតឹងរ៉ឹងសម្រាប់តែប្រជាជនប៉ាឡេស្ទីនដែលចង់ចាកចេញពីតំបន់រងការបំផ្លិចបំផ្លាញដោយសង្គ្រាមមួយនេះប៉ុណ្ណោះ និងសម្រាប់ជនភៀសខ្លួនដែលបានចាកចេញពីការប្រយុទ្ធគ្នាក្នុងខែដំបូងនៃសង្គ្រាម ដើម្បីត្រឡប់ចូលទៅហ្កាហ្សាវិញ។ មនុស្សជាច្រើនដែលត្រូវបានរំពឹងថានឹងចាកចេញ គឺជាប្រជាជនហ្កាហ្សាដែលមានជំងឺ និងរងរបួស ដែលត្រូវការការថែទាំសុខភាពនៅបរទេស៕