ប្រទេសកាតា កំពុងពង្រឹងកិច្ចប្រឹងប្រែងផ្នែកការទូត ដើម្បីទប់ស្កាត់មិនឱ្យជម្លោះក្នុងតំបន់កើនឡើងកាន់តែទូលំទូលាយ ខណៈភាពតានតឹងនៅតែឡើងកម្ដៅរវាងអ៊ីរ៉ង់ និងលោកខាងលិច ដោយទីក្រុងដូហាកំពុងសម្របសម្រួលយ៉ាងជិតស្និទ្ធជាមួយអេហ្ស៊ីប និងទួរគី ដើម្បីរក្សាផ្លូវទូតឱ្យនៅបើកចំហ។

លោក Sheikh Mohammed bin Abdulrahman Al-Thani ដែលជានាយករដ្ឋមន្ត្រីកាតា និងជារដ្ឋមន្ត្រីការបរទេសផងដែរនោះ បានជួបពិភាក្សាជាមួយមន្ត្រីសន្តិសុខជាន់ខ្ពស់របស់អ៊ីរ៉ង់ គឺលោក Ali Larijani នៅទីក្រុងតេអេរ៉ង់ កាលពីថ្ងៃសៅរ៍ចុងសប្ដាហ៍មុន ហើយកិច្ចពិភាក្សាផ្តោតលើការបន្ធូរស្ថានការណ៍ និងបញ្ចៀសផលវិបាកក្នុងតំបន់មជ្ឈិមបូព៌ាកាន់តែទូលំទូលាយ។ បន្ទាប់ពីកិច្ចប្រជុំនេះ លោក Larijani បាននិយាយលើបណ្ដាញសង្គម X ថា «ការរៀបចំរចនាសម្ព័ន្ធសម្រាប់កិច្ចចរចាកំពុងដំណើរការទៅមុខ» ទោះបីជាការចរចាដោយផ្ទាល់ជាមួយអាមេរិក មិនត្រូវបានបញ្ជាក់ជាសាធារណៈក៏ដោយ។

ការជំរុញផ្នែកការទូតនេះ បានកើតឡើងខណៈក្រុមមន្ត្រីអ៊ីរ៉ង់ ចេញការព្រមានកាន់តែខ្លាំងក្លាទៅកាន់សហភាពអឺរ៉ុប និងបណ្តាប្រទេសលោកខាងលិច ដែលបង្ហាញថា ភាពតានតឹងមិនព្រមអន់ថយ ស្របពេលការគំរាមកំហែងផ្នែកយោធាដាក់គ្នាទៅវិញទៅមក។ ទោះបីជាវោហាសាស្រ្តកាន់តែកម្រោលក៏ដោយ ប៉ុន្តែលោកប្រធានាធិបតីអាមេរិក Donald Trump បានបង្ហើបថា ការចរចានៅតែអាចធ្វើបាន ដោយប្រាប់អ្នកយកព័ត៌មានថា អ៊ីរ៉ង់កំពុង «ពិភាក្សាជាមួយអាមេរិកដោយស្មោះ»។

ក្នុងសេចក្តីថ្លែងការណ៍មួយ ប្រទេសកាតា បានបញ្ជាក់ជាថ្មីនូវការគាំទ្ររបស់ខ្លួនចំពោះដំណោះស្រាយដោយសន្តិវិធី និងសង្កត់ធ្ងន់លើតម្រូវការក្នុងការជួយសង្គ្រោះប្រជាជនក្នុងតំបន់ កុំឱ្យជួបផលវិបាកភាពពីតានតឹងបន្ថែមទៀត។ ទីក្រុងដូហា ក៏បានសង្កត់ធ្ងន់លើការបន្តសម្របសម្រួលជាមួយប្រទេសនានាដែលមាន «ភាតរភាព» និងជាមិត្ត នៅក្នុងអ្វីដែលត្រូវបានគេមើលឃើញយ៉ាងទូលំទូលាយថា ជាសញ្ញានៃការជំរុញឱ្យមានការអត់ធ្មត់ជារួម ជាជាងការប្រឈមមុខដាក់គ្នា៕