ការស្ទង់មតិវិស័យឯកជន បានបង្ហាញនៅថ្ងៃចន្ទ (២ កុម្ភៈ) នេះថា សកម្មភាពរោងចក្រនៅតំបន់អាស៊ី បានពង្រីកជំហររបស់ខ្លួននៅក្នុងខែមករា កន្លងទៅ ដោយសារតែតម្រូវការសកលដ៏រឹងមាំ បានបង្កើនការបញ្ជាទិញពីខាងក្រៅ ខណៈទិន្នន័យដ៏ល្អនេះបានផ្ដល់ការធានាខ្លះៗដល់អ្នកបង្កើតគោលនយោបាយថា ផលប៉ះពាល់ពីពន្ធគយខ្ពស់របស់សហរដ្ឋអាមេរិក បានកន្លងផុតហើយសម្រាប់ពេលនេះ។

សន្ទស្សន៍ពី RatingDog ដែលជាស្ថាប័នគ្រប់គ្រងផលិតកម្មទូទៅរបស់ចិន (PMI) ចងក្រងដោយស្ថាប័ន S&P Global បានបង្ហាញថា ទិន្នន័យរោងចក្ររបស់ចិន បានកើនឡើងដល់ ៥០,៣ ពិន្ទុនៅខែមករា ពីតួលេខ ៥០,១ ក្នុងខែធ្នូ ដែលជាកំណើនកម្រិតខ្ពស់បំផុតចាប់តាំងពីខែតុលាមក។

សន្ទស្សន៍ PMI របស់ជប៉ុន បានកើនឡើងដល់ ៥១,៥ ក្នុងខែមករា ពីតួលេខ ៥០,០ ក្នុងខែធ្នូ ដែលជាកម្រិតខ្លាំងបំផុតចាប់តាំងពីខែសីហា ឆ្នាំ២០២២មក។ សន្ទស្សន៍ PMI របស់កូរ៉េខាងត្បូង ក៏បានកើនឡើងដល់ ៥១,២ ក្នុងខែមករា ពីតួលេខ ៥០,១ ក្នុងខែធ្នូ ដែលនេះក៏ជាអំណានខ្ពស់បំផុតផងដែរចាប់តាំងពីខែសីហា ឆ្នាំ២០២៤។

ការរំពឹងទុកដ៏ភ្លឺស្វាងសម្រាប់តម្រូវការសកល បានជួយពង្រីកសកម្មភាពរោងចក្រនៅទូទាំងអាស៊ី បន្ទាប់ពីភាពមិនច្បាស់លាស់ផ្នែកពន្ធគយពីសហរដ្ឋអាមេរិក។ ការស្ទង់មតិក៏បានបង្ហាញឱ្យឃើញថា សន្ទស្សន៍ PMI ផ្សេងទៀតដូចជាកោះតៃវ៉ាន់ ឥណ្ឌូនេស៊ី ម៉ាឡេស៊ី ហ្វីលីពីន វៀតណាម និងកន្លែងផ្សេងទៀត ក៏ទទួលបានកំណើននៅក្នុងខែមករាផងដែរ៕