ក្រុមព្យាករអាកាសធាតុ បានព្រមានថា ស្ថានភាពត្រជាក់ខ្លាំងនឹងបន្តរហូតដល់ព្រឹកថ្ងៃចន្ទ ទី២ ខែកុម្ភៈ នេះ ពេលវេលានៅសហរដ្ឋអាមេរិក សម្រាប់ផ្នែកដ៏ធំចាប់ពីតំបន់ឆ្នេរឈូងសមុទ្រ រហូតដល់តំបន់ New England ដែលទើបតែជួបប្រទះព្យុះរដូរងាដ៏ខ្លាំងក្លាកាលពីចុងសប្តាហ៍កន្លងទៅ ដោយបាននាំមកនូវព្រិលធ្លាក់ខ្លាំង ការលុបចោលជើងហោះហើររាប់ពាន់ជើង និងខ្យល់កន្ត្រាក់ដ៏បំផ្លិចបំផ្លាញ។

បន្ទាប់ពីនោះ អ្នកឧតុនិយមនិយាយថា សីតុណ្ហភាពនឹងចាប់ផ្តើមកើនឡើងវិញជាលំដាប់ ប៉ុន្តែទុក្ខលំបាកនឹងនៅតែមានសម្រាប់មនុស្សរាប់ម៉ឺននាក់ដែលនៅតែគ្មានអគ្គិសនីប្រើប្រាស់ដោយសារព្យុះទឹកកកកាលពីខែមុន នៅភាគខាងត្បូង។ ចាប់តាំងពីចុងខែមករាមក របាយការណ៍ក្នុងស្រុកបានឱ្យដឹងថា ការស្លាប់ជាង ១១០នាក់ បានកើតឡើងទាក់ទងនឹងបញ្ហាអាកាសធាតុរដូវរងា និងព្យុះ។

អ្នកឧតុនិយមនៃសេវាអាកាសធាតុជាតិអាមេរិក បាននិយាយថា មនុស្សប្រហែល ១៥០លាននាក់ បន្តស្ថិតនៅក្រោមការព្រមានអំពីអាកាសធាតុត្រជាក់ខ្លាំង និងការព្រមានផ្នែកអាកាសធាតុផ្សេងទៀតនៅភាគខាងកើតនៃសហរដ្ឋអាមេរិក នៅបណ្ដារដ្ឋភាគខាងត្បូង រួមទាំងម៉ាសខ្យល់ដ៏ត្រជាក់បំផុតមិនធ្លាប់មានសម្រាប់ភាគខាងត្បូងរដ្ឋ Florida គិតចាប់តាំងពីខែធ្នូ ឆ្នាំ១៩៨៩ មក។

អាកាសធាតុអាក្រក់បានបង្កចលាចលផ្លូវអាកាសយ៉ាងច្រើនដល់ពលរដ្ឋអាមេរិក ដោយយោងតាមស្ថាប័នតាមដានទិន្នន័យជើងហោះហើរ FlightAware បានឱ្យដឹងថា ការលុបចោលជើងហោះហើរលើសពី ២.៨០០ជើង នៅសហរដ្ឋអាមេរិក ត្រូវបានរាយការណ៍កាលពីថ្ងៃសៅរ៍ ដោយមានការរំខានយ៉ាងតិច ១.៨០០ជើងបន្ថែមទៀតកាលពីថ្ងៃអាទិត្យ៕