មន្ត្រីអ៊ីរ៉ង់ កាលពីថ្ងៃអាទិត្យ (១ កុម្ភៈ) បានបដិសេធថា ទីក្រុងតេអេរ៉ង់ មិនមានគម្រោងធ្វើសមយុទ្ធបាញ់គ្រាប់ពិតនៅច្រកសមុទ្រ Hormuz ក្នុងសប្តាហ៍នេះនោះទេ ស្របពេលមានភាពតានតឹងខ្ពស់នៅក្នុងតំបន់ និងបន្ទាប់ពីការព្រមានរបស់យោធាសហរដ្ឋអាមេរិក។

ថ្លែងទៅកាន់ទីភ្នាក់ងារសារព័ត៌មានរ៉យទ័រ មន្ត្រីអ៊ីរ៉ង់រូបនោះបាននិយាយថា កងកម្លាំងជើងទឹកនៃកងឆ្មាំបដិវត្តន៍អ៊ិស្លាមអ៊ីរ៉ង់ (IRGC) ពុំមានគម្រោងធ្វើសមយុទ្ធបាញ់នៅច្រកសមុទ្រដ៏សំខាន់នេះ ដូចដែលបានរាយការណ៍ដោយប្រព័ន្ធផ្សព្វផ្សាយរដ្ឋអ៊ីរ៉ង់ កាលពីដើមសប្តាហ៍នេះទេ។ គួរឱ្យដឹងថា ទូរទស្សន៍ Press TV ដែលគ្រប់គ្រងដោយរដ្ឋអ៊ីរ៉ង់ បានរាយការណ៍កាលពីថ្ងៃព្រហស្បតិ៍សប្ដាហ៍មុនថា កងកម្លាំងជើងទឹក នឹងធ្វើសមយុទ្ធនៅថ្ងៃអាទិត្យ និងថ្ងៃចន្ទនេះ។

ការច្រានចោលផែនការហ្វឹកហ្វឺននេះ បានកើតឡើងបន្ទាប់ពីយោធាអាមេរិក បានចេញសេចក្តីថ្លែងការណ៍មួយ ដោយព្រមានអ៊ីរ៉ង់ កុំឱ្យធ្វើសមយុទ្ធបែបនេះ និងជំរុញឱ្យអ៊ីរ៉ង់ជៀសវាង «ហានិភ័យដែលមិនចាំបាច់»។ ច្រកសមុទ្រ Hormuz គឺជាផ្លូវទឹកដ៏សំខាន់មួយ ជាទីដែលបណ្ដាញផ្គត់ផ្គង់ប្រេងសកលប្រហែល ២០% ត្រូវឆ្លងកាត់នៅទីនោះ។

សហរដ្ឋអាមេរិក បានបង្កើនវត្តមានកងទ័ពជើងទឹករបស់ខ្លួននៅមជ្ឈិមបូព៌ា បន្ទាប់ពីលោកប្រធានាធិបតី Donald Trump បានគំរាមកំហែងធ្វើអន្តរាគមន៍ម្តងហើយម្តងទៀតចំពោះអ៊ីរ៉ង់ ប្រសិនបើទីក្រុងតេអេរ៉ង់ មិនយល់ព្រមលើកិច្ចព្រមព្រៀងនុយក្លេអ៊ែរ ឬបរាជ័យក្នុងការបញ្ឈប់ការកាប់សម្លាប់ក្រុមបាតុករ៕