សារព័ត៌មាន AP បានរាយការណ៍ដោយដកស្រង់ពីក្រុមអ្នកវិភាគថា សមត្ថភាពរបស់សម្ព័ន្ធយោធាណាតូ ក្នុងការទប់ស្កាត់រុស្ស៊ី កំពុងតែជួបបញ្ហា ដោយសារការខ្វែងគំនិតជាច្រើនក្នុងចំណោមសម្ព័ន្ធមិត្តឆ្លងអាត្លង់ទិក។ សម្ព័ន្ធមិត្តអឺរ៉ុប និងកាណាដា កំពុងចាយប្រាក់រាប់ពាន់លានដុល្លារ ដើម្បីជួយដល់អ៊ុយក្រែន ហើយក៏គ្រោងបង្កើនថវិកាផ្ទាល់ខ្លួនដើម្បីការពារទឹកដីរបស់ពួកគេ។ 

ប៉ុន្តែបើទោះបីជាមានកិច្ចប្រឹងប្រែងទាំងនោះក៏ដោយ ក៏ភាពជឿជាក់របស់អង្គការណាតូ ក្នុងនាមជាកម្លាំងឯកភាពក្រោមការដឹកនាំរបស់សហរដ្ឋអាមេរិក បានរងការប៉ះពាល់យ៉ាងខ្លាំងក្នុងពេល ១ឆ្នាំកន្លងមកនេះ ខណៈទំនុកចិត្តក្នុងសម្ព័ន្ធយោធាសមាជិក ៣២ប្រទេសមួយនេះ បានរងភាពជូរចត់។

ការបែកបាក់កើតឡើងកាន់តែច្បាស់បំផុត ជុំវិញការគំរាមកំហែងម្តងហើយម្តងទៀតរបស់លោកប្រធានាធិបតីអាមេរិក Donald Trump ក្នុងការដណ្តើមគ្រប់គ្រងកោះហ្គ្រីនលែន ដែលជាទឹកដីពាក់កណ្តាលស្វយ័តរបស់សម្ព័ន្ធមិត្តណាតូ គឺដាណឺម៉ាក។ ហើយថ្មីៗនេះ សុន្ទរកថាបែបមើលងាយរបស់លោក Trump អំពីកងទ័ពសម្ព័ន្ធមិត្តណាតូនៅអាហ្វហ្គានីស្ថាន ក៏បានទាក់ទាញការតវ៉ាថ្មីមួយទៀត។

ក្រុមអ្នកវិភាគនិយាយថា ខណៈដែលកម្ដៅនៅលើកោះហ្គ្រីនលែន បានថយចុះសម្រាប់ពេលនេះ ក៏ប៉ុន្តែការឈ្លោះប្រកែកផ្ទៃក្នុង បានធ្វើឱ្យប៉ះពាល់ដល់សមត្ថភាពរបស់សម្ព័ន្ធមិត្តសន្តិសុខធំបំផុតរបស់ពិភពលោក ក្នុងការទប់ស្កាត់ការគំរាមកំហែង ដែលខ្លួនចង្អុលទៅរុស្ស៊ី។ សមត្ថភាពរារាំងរុស្ស៊ី គឺពឹងផ្អែកលើការធានាថា លោកប្រធានាធិបតីរុស្ស៊ី Vladimir Putin ពិតជាជឿជាក់ថាអង្គការណាតូ នឹងរួបរួមគ្នាសងសឹក ប្រសិនបើលោកពង្រីកសង្គ្រាមហួសពីអ៊ុយក្រែន ប៉ុន្តែឥឡូវនេះ ការរារាំងទីក្រុងមូស្គូហាក់រងផលប៉ះពាល់ ដោយសារភាពមិនចុះសម្រុងរបស់សម្ព័ន្ធយោធាមួយនេះ៕