អាជ្ញាធរប្រទេសអ៊ីស្រាអែល បានបង្កើនយុទ្ធនាការបណ្តេញចេញដោយបង្ខំនៅទូទាំងតំបន់កាន់កាប់ West Bank ដោយបានចេញបញ្ជាឱ្យបណ្តេញពលរដ្ឋនៅសហគមន៍បេឌូអ៊ីន (Bedouin) ទាំងមូលចេញ នៅភាគខាងកើតទីក្រុងរ៉ាម៉ាឡា(Ramallah) និងបង្កើនគោលនយោបាយរុះរើកាន់តែខ្លាំងឡើងនៅក្រុងយេរុយសាឡឹមខាងកើត។

វិធានការទាំងនេះ ធ្វើឡើងក្នុងពេលមានការកើនឡើងអំពើហិង្សារបស់អ្នកតាំងលំនៅដែលដាក់គោលដៅលើស្ថាប័នអប់រំនៅជ្រលងភ្នំហ្ស៊កដានី និងលំនៅឋាននៅតំបន់ Qalqilya ដែលធ្វើឱ្យកន្លែងទំនេរសម្រាប់រស់នៅរបស់ប្រជាជនប៉ាឡេស្ទីនកាន់តែរួមតូចក្រោមការកាន់កាប់របស់យោធា។

ប្រភពព័ត៌មានក្នុងស្រុកបានបញ្ជាក់ទៅកាន់ទីភ្នាក់ងារសារព័ត៌មាន Wafa ថា ទាហានបានចេញបញ្ជាយោធា ដែលតម្រូវឱ្យប្រជាជនចំនួន៤០នាក់នៅក្នុងសហគមន៍ត្រូវរុះរើលំនៅឋានរបស់ពួកគេ និងចាកចេញពីតំបន់នោះក្នុងរយៈពេល ៤៨ ម៉ោង។ កងទ័ពបានប្រកាសថាទីតាំងនោះជា «តំបន់យោធាបិទជិត» ជាយុទ្ធសាស្ត្រដែលត្រូវបានគេប្រើជាញឹកញាប់ដើម្បីឈូសឆាយដែនដីប៉ាឡេស្ទីនសម្រាប់ការពង្រីកទីតាំងលំនៅ។