ប្រជាជនឆែករាប់ម៉ឺននាក់បានប្រមូលផ្តុំគ្នា កាលពីថ្ងៃអាទិត្យ (ទី១ ខែកុម្ភៈ ឆ្នាំ២០២៦) ដើម្បីគាំទ្រលោកប្រធានាធិបតី Peter Pavel បន្ទាប់ពីលោកបានបដិសេធមិនយល់ព្រមលើការតែងតាំងរដ្ឋមន្ត្រីម្នាក់ទៅក្នុងរដ្ឋាភិបាលចម្រុះថ្មីដែលមានការប្រឆាំងអឺរ៉ុប ដែលបានសម្តែងការគោរពណាស៊ី និងបានបង្ហោះវត្ថុអនុស្សាវរីយ៍ណាស៊ី។

នៅក្នុងជម្លោះកាន់តែខ្លាំងឡើងជាមួយរដ្ឋាភិបាល លោក Pavel ដែលគាំទ្រសហភាពអឺរ៉ុប (EU) និងគាំទ្រអ៊ុយក្រែន កាលពីសប្តាហ៍មុន បានចោទប្រកាន់រដ្ឋមន្ត្រីការបរទេស លោកស្រី Petr Macinka ថា បានផ្ញើសារជាអក្សរតាមរយៈទីប្រឹក្សារបស់លោក ដែលបានគំរាមកំហែងប្រធានាធិបតី អំពីការមាន «ផលវិបាក» ប្រសិនបើលោកបន្តប្រឆាំងនឹងការតែងតាំងលោក Filip Turek ជារដ្ឋមន្ត្រីបរិស្ថានឆែក។

លោក Turek ដែលជាសមាជិកនៃគណបក្សស្តាំនិយម Motorists របស់លោក Macinka បានប្រឈមនឹងការរិះគន់ ចំពោះការធ្វើការគោរពតាមបែបណាហ្ស៊ី និងបង្ហោះវត្ថុអនុស្សាវរីយ៍ណាហ្ស៊ី។

អ្នកគាំទ្រប្រធានាធិបតីបាននាំគ្នាទៅជួបជុំពេញទីលាន Old Town Square និងទីលាននៅក្បែរនោះ Wenceslas Square របស់ទីក្រុង Prague ខណៈដែលនគរបាលបានបិទផ្លូវមួយចំនួន នៅក្នុងតំបន់នោះ។ ក្រុមបាតុករជាច្រើនបានគ្រវីទង់ជាតិ EU និងឆែក ហើយកាន់បដាដែលសរសេរថា «យើងឈរជាមួយលោកប្រធានាធិបតី»។

នគរបាលមិនបានប៉ាន់ស្មានជាផ្លូវការ អំពីទំហំនៃការតវ៉ានេះនោះទេ ប៉ុន្តែអ្នករៀបចំបានដាក់ចំនួនមនុស្សពី ៨០.០០០ ទៅ ៩០.០០០នាក់ ហើយបាននិយាយថា ពួកគេមានគម្រោងធ្វើបាតុកម្មបន្ថែមទៀត នៅក្នុងទីក្រុងផ្សេងទៀត ទូទាំងសាធារណរដ្ឋឆែក នាថ្ងៃទី១៥ ខែកុម្ភៈ៕