ស៊ីរីបាននិយាយកាលពីថ្ងៃអាទិត្យថា ខ្លួនបានឃុំខ្លួនក្រុមមួយ ដែលនៅពីក្រោយការវាយប្រហារដោយ     រ៉ូកែតនាពេលថ្មីៗនេះ ទៅលើអាកាសយានដ្ឋានយោធា Mezzeh ក្នុងទីក្រុងដាម៉ាស ដោយអ្នកស៊ើបអង្កេតបានអះអាងថា អាវុធជាច្រើនជារបស់ក្រុមហេសបូឡា ដែលគាំទ្រដោយអ៊ីរ៉ង់។

ក្រសួងមហាផ្ទៃបាននិយាយថា អង្គភាពសន្តិសុខ បានចាប់ខ្លួនសមាជិកទាំងអស់របស់ក្រុមនេះ ដែលក្រសួងនេះ បានអះអាងថា បានធ្វើការវាយប្រហារជាច្រើនលើកលើអាកាសយានដ្ឋាន ក្នុងរយៈពេលប៉ុន្មានខែថ្មីៗនេះ បន្ទាប់ពីការឃ្លាំមើលទីតាំងបាញ់រ៉ូកែតជាច្រើន ដែលត្រូវសង្ស័យនៅក្នុងតំបន់នៃរដ្ឋធានីនេះ។

ក្រសួងបានបញ្ជាក់ថា អាវុធដែលប្រើក្នុងការវាយប្រហារនេះ មានប្រភពមកពីក្រុមហេសបូឡា នៅប្រទេសលីបង់ ដែលជាសម្ព័ន្ធមិត្តរបស់អតីតប្រធានាធិបតី លោក បាសា អាល់អាសាដ (Bashar al-Assad) ដែលធ្លាប់មានវត្តមានយោធាយ៉ាងច្រើននៅទូទាំងប្រទេសស៊ីរី ដើម្បីគាំទ្រកងទ័ពរបស់លោក អាសាដ។

ក្រុមហេសបូឡា បានបដិសេធការចោទប្រកាន់នេះ ហើយបាននិយាយថា ខ្លួនមិនមានសកម្មភាព ឬទំនាក់ទំនងជាមួយក្រុមណាមួយ នៅក្នុងប្រទេសស៊ីរីទេ។ អាជ្ញាធរបាននិយាយថា ពួកគេក៏បានរឹបអូសយានដ្រូន មួយចំនួន ដែលក្រុមនេះ កំពុងរៀបចំប្រើប្រាស់ក្នុងប្រតិបត្តិការបន្ថែមទៀត។

ក្រសួងបានឲ្យដឹងថា អ្នកដែលត្រូវចាប់ខ្លួនទាំងនោះ មានទំនាក់ទំនងជាមួយ «អង្គភាពបរទេស» ដែលមិនស្គាល់អត្តសញ្ញាណ ដោយមិនបានលើកឡើងអំពីក្រុមហេសបូឡា ឬអ៊ីរ៉ង់ទេ៕