ប្រធានាធិបតីអាមេរិក Donald Trump បានប្រកាសកាលពីថ្ងៃអាទិត្យ (ទី១ ខែកុម្ភៈ ឆ្នាំ២០២៦) ថាលោកនឹងបិទមជ្ឈមណ្ឌល Kennedy Center រយៈពេល ២ឆ្នាំ សម្រាប់ការជួសជុលឡើងវិញ ខណៈដែលអគារសិល្បៈដ៏ល្បីល្បាញ នៅទីក្រុងវ៉ាស៊ីនតោនមួយនេះ កំពុងជួបការលំបាក ដោយយសារការធ្លាក់ចុះនូវការលក់សំបុត្រ និងប្រតិកម្មពីអ្នកសម្ដែង។

លោក Trump បានបញ្ជាក់ថា ការបិទនេះនឹងចាប់ផ្តើមនៅថ្ងៃទី៤ ខែកក្កដា ដែលជាខួបលើកទី២៥០ របស់ប្រទេស។ ចាប់តាំងពីវិលត្រឡប់មកកាន់តំណែងវិញ លោក Trump បានចាប់ផ្តើមការគ្រប់គ្រងមជ្ឈមណ្ឌលដែលមិនមាននិន្នាការនយោបាយ ដោយដាក់ឈ្មោះកម្មវិធីមួយចំនួនរបស់ខ្លួនថា «ភ្ញាក់ឡើង» និងបន្ថែមឈ្មោះផ្ទាល់ខ្លួនរបស់លោក នៅផ្នែកខាងមុខ។

លោក Trump ដែលជាប្រធានក្រុមប្រឹក្សាភិបាលនៃមជ្ឈមណ្ឌលនេះ បានបង្ហោះនៅលើវេទិកាបណ្ដាញ Truth Social របស់លោកថា៖ «ខ្ញុំបានកំណត់ថា វិធីលឿនបំផុត ដើម្បីនាំឲ្យមជ្ឈមណ្ឌល Trump Kennedy Center ទៅកាន់កម្រិតខ្ពស់បំផុតនៃភាពជោគជ័យ ស្រស់ស្អាត និងភាពអស្ចារ្យ គឺត្រូវបញ្ឈប់ប្រតិបត្តិការកម្សាន្តរយៈពេលប្រហែល ២ឆ្នាំ»។

លោកបានបន្ថែមថា ការសម្រេចចិត្តនេះ នឹងត្រូវការការយល់ព្រមពីក្រុមប្រឹក្សាភិបាល ដែលលោកបានជ្រើសរើសដោយផ្ទាល់នៅពេលចូលកាន់តំណែងជាប្រធាន កាលពីឆ្នាំមុន៕