ប្រជាជនប៉ាឡេស្ទីន បានចាប់ផ្តើមចូលឡើងវិញ តាមច្រកព្រំដែន Rafah រវាងតំបន់ហ្កាហ្សាស្ទ្រីប និងប្រទេសអេហ្ស៊ីប បន្ទាប់ពីវាបានបើកជាថ្មី សម្រាប់ការធ្វើដំណើររបស់ប្រជាជន។

ច្រកព្រំដែននេះ ភាគច្រើនត្រូវបានបិទចាប់តាំងពីខែឧសភា ឆ្នាំ២០២៤ នៅពេលដែលផ្នែកខាងប៉ាឡេស្ទីន ត្រូវបានគ្រប់គ្រងដោយកងកម្លាំងអ៊ីស្រាអែល។ ការបើកឡើងវិញនេះ ដែលត្រូវបានពន្យារពេលជាយូរមកហើយនោះ គឺជាផ្នែកសំខាន់មួយនៃដំណាក់កាលដំបូងនៃផែនការបទឈប់បាញ់របស់ប្រធានាធិបតីអាមេរិក Donald Trump រវាងអ៊ីស្រាអែល និងក្រុមហាម៉ាស ដែលបានចាប់ផ្តើមកាលពីខែតុលាឆ្នាំមុន។

មានតែមនុស្សមួយចំនួនប៉ុណ្ណោះដែលនឹងអាចឆ្លងកាត់ជារៀងរាល់ថ្ងៃ។ ជំនួយមនុស្សធម៌ និងទំនិញពាណិជ្ជកម្ម នៅតែមិនត្រូវបានអនុញ្ញាតដដែល។ ប្រជាជនប៉ាឡេស្ទីនដែលមានជំងឺ និងរបួសប្រហែល ២០.០០០នាក់ កំពុងរង់ចាំចាកចេញពីតំបន់ហ្កាហ្សា ដើម្បីទទួលបានការព្យាបាល។

របាយការណ៍របស់អ៊ីស្រាអែល ឲ្យដឹងថា មានតែអ្នកជំងឺ ៥០នាក់ប៉ុណ្ណោះ អមដោយសាច់ញាតិ ២នាក់ នឹងត្រូវបានអនុញ្ញាតឲ្យចេញជារៀងរាល់ថ្ងៃ ហើយថា មនុស្ស ៥០នាក់ ក្នុងចំណោមមនុស្សរាប់ម៉ឺននាក់ដែលបានចាកចេញពីតំបន់ហ្កាហ្សា អំឡុងសង្គ្រាម នឹងត្រូវបានអនុញ្ញាតឲ្យត្រឡប់មកវិញ។

អង្គការសុខភាពពិភពលោក (WHO) នឹងត្រួតពិនិត្យការផ្ទេរអ្នកជំងឺពីដែនដីដែលស្ថិតនៅក្រោមការគ្រប់គ្រងរបស់ក្រុមហាម៉ាស ដោយដឹកពួកគេតាមរថយន្តក្រុងឆ្លងកាត់តំបន់គ្រប់គ្រងដោយយោធាអ៊ីស្រាអែល ទៅកាន់ច្រកឆ្លងកាត់នេះ។ នេះបើយោងតាមការដឹងរបស់ប្រព័ន្ធផ្សព្វផ្សាយ BBC News។

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បានព្រមានថា អ្នកណាដែលឆ្លងកាត់ខ្សែបន្ទាត់លឿង ដែលសម្គាល់តំបន់គ្រប់គ្រងដោយអ៊ីស្រាអែលក្រោមកិច្ចព្រមព្រៀងឈប់បាញ់ នឹងត្រូវ «បាញ់ប្រហារ»។ ច្រកឆ្លងកាត់ Rafah នឹងត្រូវបានគ្រប់គ្រងដោយអ្នកត្រួតពិនិត្យមកពីសហភាពអឺរ៉ុប និងបុគ្គលិកប៉ាឡេស្ទីនមូលដ្ឋាន ខណៈដែលអ៊ីស្រាអែលនឹងធ្វើការត្រួតពិនិត្យសន្តិសុខពីចម្ងាយ៕