អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បាននិយាយថា ប្រសិនបើសន្ធិសញ្ញា New START ផុតកំណត់ដោយគ្មានកិច្ចព្រមព្រៀងថ្មី ពិភពលោកគួរតែបារម្ភ ពីព្រោះមហាអំណាចនុយក្លេអ៊ែរធំជាងគេបំផុត មិនមានដែនកំណត់អាវុធនុយក្លេអ៊ែររបស់ខ្លួនឡើយ ដោយអាចជាលើកដំបូង ចាប់តាំងពីដើមទសវត្សរ៍ឆ្នាំ១៩៧០។

សន្ធិសញ្ញា New START ដែលត្រូវបានចុះហត្ថលេខាក្នុងឆ្នាំ២០១០ ដោយអតីតប្រធានាធិបតីអាមេរិក លោក Barack Obama និងលោក Medvedev ដែលបានកាន់តំណែងជាប្រធានាធិបតីរុស្ស៊ី ពីឆ្នាំ២០០៨ ដល់ឆ្នាំ២០១២ បានកំណត់ក្បាលគ្រាប់នុយក្លេអ៊ែរយុទ្ធសាស្ត្រដែលដាក់ពង្រាយដល់ចំនួន ១.៥៥០គ្រាប់ សម្រាប់ភាគីទាំង២។

សន្ធិសញ្ញានេះត្រូវផុតកំណត់នៅថ្ងៃទី៥ ខែកុម្ភៈ ហើយមន្ត្រីរុស្ស៊ី បានឲ្យដឹងថា ពួកគេមិនទាន់មានការឆ្លើយតបជាផ្លូវការពីទីក្រុងវ៉ាស៊ីនតោននៅឡើយទេ ជុំវិញសំណើរបស់ប្រធានាធិបតី លោក Vladimir Putin ដើម្បីបន្តកិច្ចព្រមព្រៀងកម្រិតមីស៊ីល និងក្បាលគ្រាប់ដែលមានស្រាប់ សម្រាប់រយៈពេលមួយឆ្នាំទៀត។

ដោយផ្ដល់បទសម្ភាសន៍ជាមួយសារព័ត៌មាន Reuters, TASS និង WarGonzo ដែលជាវេបសាយសរសេរពីសង្គ្រាមរុស្ស៊ី ក្នុងបទសម្ភាសន៍មួយនៅគេហដ្ឋានរបស់លោក នៅខាងក្រៅទីក្រុងមូស្គូ លោក Medvedev បានប្រាប់ថា៖ «ខ្ញុំមិនចង់និយាយថា នេះមានន័យថា ជាគ្រោះមហន្តរាយភ្លាមៗ ហើយសង្គ្រាមនុយក្លេអ៊ែរ នឹងចាប់ផ្តើមនោះទេ ប៉ុន្តែវានៅតែជាអ្វី ដែលគួរតែធ្វើឲ្យមនុស្សគ្រប់គ្នាត្រូវបារម្ភ»។

“លោកបានសង្កត់ធ្ងន់ថា៖ «ទ្រនិចនាឡិកា (ថ្ងៃវិនាស) កំពុងដើរ ហើយជាក់ស្តែង ល្បឿន គឺកាន់តែលឿនជាងមុន»។

កាលពីខែមករា ប្រធានាធិបតីអាមេរិក លោក Donald Trump បានបង្ហាញថា លោកនឹងបណ្ដោយឲ្យសន្ធិសញ្ញានេះផុតកំណត់តាមធម្មតា។ លោក Trump បាននិយាយនៅក្នុងបទសម្ភាសន៍ជាមួយសារព័ត៌មាន New York Times ថា៖ «ប្រសិនបើវាផុតកំណត់ វានឹងផុតកំណត់។ យើងនឹងត្រឹមតែធ្វើកិច្ចព្រមព្រៀងដ៏ប្រសើរមួយប៉ុណ្ណោះ»៕