​

ការលក់ទំនិញមិនជាប់ពន្ធ នៅតាមហាងលក់ទំនិញធំៗរបស់ជប៉ុន បានធ្លាក់ចុះជាថ្មីទៀត នៅក្នុងខែមករា ដែលបង្ហាញពីការមានផលវិបាកយូរអង្វែង ចំពោះឧស្សាហកម្មលក់រាយរបស់ប្រទេស ខណៈដែលភាពតានតឹង រវាងទីក្រុងតូក្យូ និងទីក្រុងប៉េកាំង មិនបង្ហាញនូវសញ្ញាធូរស្រាលនោះឡើយ។

ក្រុមហ៊ុន Takashimaya បានរាយការណ៍ពីការធ្លាក់ចុះ ១៩ភាគរយនៃការលក់ទំនិញមិនជាប់ពន្ធ ដោយលើកឡើងពីការណែនាំ អំពីការធ្វើដំណើររបស់ទីក្រុងប៉េកាំងដែលមិនជំរុញឲ្យទៅលេងកម្សាន្តនៅប្រទេសជប៉ុន ទោះបីជាការលក់ទំនិញនៅហាងដូចគ្នា បានកើនឡើង ៧,៤ភាគរយក៏ដោយ។ ក្រុមហ៊ុន J. Front Retailing បានឲ្យដឹងថា ការលក់ទំនិញមិនជាប់ពន្ធ នៅហាង Daimaru និង Matsuzakaya របស់ខ្លួនបានធ្លាក់ចុះប្រហែល ១៧ភាគរយ ដែលកម្រិតកំណើនលក់សរុបនៅត្រឹម ០,៧ភាគរយ។

ការលក់ឲ្យអតិថិជនចិន បានធ្លាក់ចុះប្រហែល ៦០ភាគរយ ដោយសារតែមិនមានអ្នកទេសចរចិន នៅក្នុងខែមករា ដែលជះឥទ្ធិពលដល់កំណើនលក់សរុបរបស់ក្រុមហ៊ុន H2O Retailing ដែលមាន ៤,២ភាគរយ។ ក្រុមហ៊ុន Isetan Mitsukoshi Holdings បានរាយការណ៍ពីការលក់ទំនិញមិនជាប់ពន្ធ នៅទូទាំងហាងក្នុងប្រទេស បានធ្លាក់ចុះ ១៥ភាគរយ កាលពីក្នុងខែធ្នូឆ្នាំមុន ដែលធ្វើឲ្យកំណើនលក់សរុបធា្លក់មកត្រឹម ២,១ភាគរយ។ កាលពីខែមុន ក្រុមហ៊ុន Matsuya បានរាយការណ៍ពីការធ្លាក់ចុះប្រហែល ១៦ភាគរយ នៅហាងដ៏ធំរបស់ខ្លួន គឺ Ginza ដោយបានលើកឡើងពីការបាត់វត្តមានអតិថិជនចិនផងដែរ។

គួរបញ្ជាក់ថា ភ្ញៀវទេសចរចិន គឺជាឆ្អឹងខ្នងនៃការងើបឡើងវិញរបស់សេដ្ឋកិច្ចរបស់ជប៉ុន ក្រោយជំងឺកូវីដ១៩ ដោយរួមចំណែកប្រហែល ១ភាគ៥នៃប្រាក់ចំណូលទេសចរណ៍ចំនួន ៩,៦សែនកោដិយ៉េន (ប្រមាណជា ៦២ពាន់លានដុល្លារ) ក្នុងឆ្នាំ២០២៥។ ប៉ុន្តែទំនាក់ទំនងកាន់តែអាក្រក់ទៅៗ ជុំវិញការកត់សម្គាល់របស់នាយករដ្ឋមន្ត្រីជប៉ុន លោកស្រី Sanae Takaichi អំពីបញ្ហាកោះតៃវ៉ាន់ បានបង្ហាញពីការពឹងផ្អែកយ៉ាងខ្លាំងរបស់ប្រទេសនេះ លើចិន ដែលជំរុញឲ្យប្រទេសធ្វើពិពិធកម្មតម្រូវការ៕