មន្ត្រីជាន់ខ្ពស់អ៊ីស្រាអែល ២រូប បានឲ្យដឹងនៅថ្ងៃចន្ទ (ទី២ ខែកុម្ភៈ ឆ្នាំ២០២៦) ថា បេសកជនជាន់ខ្ពស់របស់ប្រធានាធិបតីអាមេរិក លោក Donald Trump គឺលោក Steve Witkoff ត្រូវបានគេរំពឹងថា នឹងទស្សនកិច្ច នៅប្រទេសអ៊ីស្រាអែល ដើម្បីជួបជាមួយនាយករដ្ឋមន្ត្រី លោក Benjamin Netanyahu និងប្រមុខយោធាអ៊ីស្រាអែល។

មន្ត្រីទាំងនេះ បានបង្ហើបថា ដំណើរទស្សនកិច្ចរបស់លោក Witkoff នេះ ត្រូវបានគេរំពឹងថា នឹងចាប់ផ្តើមនៅថ្ងៃអង្គារ។ ការធ្វើដំណើរនេះកើតឡើងស្របពេលមានការកើនឡើងនូវភាពតានតឹងក្នុងតំបន់ ជាមួយអ៊ីរ៉ង់ និងខណៈដែលរដ្ឋបាលលោកប្រធានាធិបតី Donald Trump កំពុងជំរុញផែនការរបស់ខ្លួន ដើម្បីបញ្ចប់សង្គ្រាម នៅតំបន់ហ្កាហ្សា។

អ៊ីរ៉ង់កំពុងថ្លឹងថ្លែងលក្ខខណ្ឌ សម្រាប់ការចាប់ផ្ដើមការចរចាឡើងវិញ ជាមួយសហរដ្ឋអាមេរិក ពោលគឺភ្លាមៗបន្ទាប់ពីភាគីទាំង២ បានបង្ហាញពីការត្រៀមខ្លួនរួចជាស្រេច ដើម្បីចាប់ផ្ដើមឡើងវិញនូវការទូត ជុំវិញជម្លោះ អំពីបញ្ហានុយក្លេអ៊ែរដ៏យូរអង្វែង និងបំបាត់ការភ័យខ្លាចពីការមានសង្គ្រាមថ្មី ក្នុងតំបន់ ។

មន្ត្រីអ៊ីស្រាអែលទី៣ បានបញ្ជាក់ថា កិច្ចប្រជុំរបស់លោក Witkoff នឹងជាការត្រៀមលក្ខណៈ មុនពេលអាចមានការចាប់ផ្ដើមឡើងវិញនូវការចរចា ហើយនឹងបន្តកិច្ចប្រជុំចុងសប្តាហ៍របស់ប្រមុខយោធាអ៊ីស្រាអែល លោក Eyal Zamir ជាមួយសមភាគីអាមេរិករបស់លោក គឺលោកឧត្តមសេនីយ៍ Dan Caine នៅទីក្រុងវ៉ាស៊ីនតោន៕