នៅថ្ងៃចន្ទ (ទី២ ខែកុម្ភៈ ឆ្នាំ២០២៦) ការស្ទង់មតិមួយ បានបង្ហាញថា គណបក្សប្រឆាំងកណ្តាល-ស្តាំនិយម Tisza របស់ប្រទេសហុងគ្រី បន្តការនាំមុខ ៨ភាគរយលើគណបក្សជាតិនិយម Fidesz របស់នាយករដ្ឋមន្ត្រី លោក Viktor Orban កាលពីខែមករា នៅមុនការបោះឆ្នោតសភាដែលគ្រោងធ្វើឡើងនៅថ្ងៃទី១២ ខែមេសា។

លោក Orban កំពុងជួបនឹងបញ្ហាប្រឈមដ៏ធំបំផុត ក្នុងយុទ្ធនាការបន្តការគ្រប់គ្រងរបស់លោក គិតចាប់តាំងពីគណបក្ស Fidesz ទទួលបានជ័យជម្នះ ក្នុងឆ្នាំ២០១០ ទោះបីជាលទ្ធផលនៅតែមិនប្រាកដប្រជាក៏ដោយ។

គណបក្ស Tisza ត្រូវបានដឹកនាំដោយអតីតអ្នកជំនាញ ក្នុងរដ្ឋាភិបាល លោក Peter Magyar ដែលបាននិយាយថា គណបក្សរបស់លោក នឹងប្រឹងដោះស្រាយអំពើពុករលួយ ធ្វើឲ្យមានការបញ្ចេញប្រាក់រាប់ពាន់លានអឺរ៉ូ នៅក្នុងមូលនិធិសហភាពអឺរ៉ុបដែលត្រូវបានបង្កក ដើម្បីជំរុញសេដ្ឋកិច្ច និងធ្វើឲ្យហុងគ្រីឈរយ៉ាងរឹងមាំ នៅក្នុងសហភាពអឺរ៉ុប (EU)។

ការបោះឆ្នោតខែមេសា នឹងមានផលវិបាកយ៉ាងធំធេង សម្រាប់ទាំងអឺរ៉ុប និងកម្លាំងនយោបាយស្តាំនិយមរបស់ខ្លួន។ លោក Orban ដែលជាសម្ព័ន្ធមិត្តរបស់ប្រធានាធិបតីអាមេរិក លោក Donald Trump តែងតែប៉ះទង្គិចជាមួយ EU ជុំវិញបញ្ហាជាច្រើន ខណៈដែលរក្សាទំនាក់ទំនងស្និទ្ធស្នាលជាមួយរុស្ស៊ី និងរិះគន់អ៊ុយក្រែន។ EU ចោទប្រកាន់លោក Orban ថា បានបំផ្លាញតម្លៃប្រជាធិបតេយ្យ នៅក្នុងប្រទេសហុងគ្រី ជាការលើកឡើងដែលលោកបដិសេធ។

ការស្ទង់មតិចុងក្រោយបង្អស់ ដែលធ្វើឡើង រវាងថ្ងៃទី ២១-២៤ ខែមករា ដោយវិទ្យាស្ថាន Publicus និងចុះផ្សាយដោយសារព័ត៌មាន Nepszava បានបង្ហាញថា ៤៨ភាគរយនៃអ្នកបោះឆ្នោតសម្រេចចិត្តហើយ បានគាំទ្រគណបក្ស Tisza ខណៈពេលដែល ៤០ភាគរយ គាំទ្រគណបក្ស Fidesz ជាកម្រិតដែលមិនផ្លាស់ប្តូរពីខែធ្នូឆ្នាំមុន៕