អ៊ីស្រាអែលនិយាយថា ពួកគេនឹងលុបចោលប្រតិបត្តិការមនុស្សធម៌នៅតំបន់ហ្កាហ្សារបស់ក្រុមគ្រូពេទ្យគ្មានព្រំដែន(MSF) ក្រោយពេលពួកគេពុំបានផ្តល់បញ្ជីឈ្មោះបុគ្គលិកប៉ាឡេស្ទីនរបស់ខ្លួន ធ្វើឲ្យជន ប៉ាឡេស្ទីននៅក្នុងតំបន់រងការឡោមព័ទ្ធមួយនេះ បាត់បង់ជំនួយសង្គ្រោះជីវិតបន្ថែមទៀត ។

កាលពីខែធ្នូ ឆ្នាំ ២០២៥កន្លងទៅ អ៊ីស្រាអែលបានប្រកាសថា ពួកគេនឹងរារាំងអង្គការជំនួយចំនួន ៣៧ រួមទាំងក្រុម MSF ពីប្រតិបត្តិការនៅក្នុងតំបន់ហ្កាហ្សា ចាប់ពីថ្ងៃទី ១ មីនា ឆ្នាំ ២០២៦នេះតទៅ សម្រាប់ការខកខានដាក់ព័ត៌មាននិយោជិកប៉ាឡេស្ទីនរបស់ពួកគេ ធ្វើឲ្យមានការថ្កោលទោសសកលពីអង្គការក្រៅរដ្ឋាភិបាល និងអង្គការសហប្រជាជាតិ(UN) ។

ក្រសួងកិច្ចការជនភៀសខ្លួន និងប្រយុទ្ធប្រឆាំងពួកយូដា នឹងចាត់វិធានការលុបចោលសកម្មភាពរបស់ក្រុម MSF នៅតំបន់ហ្កាហ្សាស្រ្ទីប ។

ក្រសួងនិយាយនៅក្នុងសេចក្តីថ្លែងការណ៍ថា ការសម្រេចចិត្តនេះ បានធ្វើឡើង បន្ទាប់ពីក្រុម MSF ពុំបានដាក់បញ្ជីឈ្មោះនិយោជិកក្នុងស្រុករបស់ពួកគេ គឺជាតម្រូវការមួយត្រូវអនុវត្តចំពោះអង្គការមនុស្សធម៌ទាំងអស់ដែលប្រតិបត្តិការក្នុងតំបន់ ។

មុននេះពួកគេបានចោទប្រកាន់និយោជិក ២នាក់របស់ MSFថាមានការជាប់ពាក់ព័ន្ធនឹងក្រុមជីវពលហាម៉ាស និងក្រុមអ៊ិស្លាមជីហាដ ដែលអង្គការមួយនេះ ធ្វើការច្រានចោល ។

កាលពីថ្ងៃអាទិត្យម្សិលមិញ ក្រសួងកិច្ចការជនភៀសខ្លួន និងប្រយុទ្ធប្រឆាំងពួកយូដា និយាយថា ក្រុម MSF បានប្តេជ្ញាចិត្តកាលពីដើមខែមករាថា នឹងចែករំលែកបញ្ជីឈ្មោះបុគ្គលិកតាមតម្រូវការរបស់អាជ្ញាធរអ៊ីស្រាអែល ប៉ុន្តែចុងក្រោយពួកគេពុំព្រមធ្វើតាមពាក្យសម្តី ដោយលើកឡើងក្តីបារម្ភពីសុវត្ថិភាពរបស់បុគ្គលិក និងកង្វះការធានាដល់វិធីប្រើប្រាស់ព័ត៌មាន ៕