រដ្ឋមន្ត្រីការបរទេសអង់គ្លេស នៅថ្ងៃចន្ទ (ទី២ ខែកុម្ភៈ ឆ្នាំ២០២៦) នេះ បាននិយាយថា លោកស្រីស្វាគមន៍ការបើកច្រកឆ្លងកាត់ព្រំដែនដ៏សំខាន់ Rafah របស់តំបន់ហ្កាហ្សា ដែលនឹងអនុញ្ញាតឲ្យប្រជាជនប៉ាឡេស្ទីនឆ្លងកាត់ទាំងទៅទាំងមកដោយថ្មើរជើង ប៉ុន្តែបានសង្កត់ធ្ងន់ថា នៅមានការងារជាច្រើនទៀតដែលត្រូវធ្វើ។

លោកស្រី Yvette Cooper បានលើកឡើងនៅលើបណ្ដាញ X ថា៖ «ខ្ញុំស្វាគមន៍ការបើកច្រកឆ្លងកាត់ Rafah ឡើងវិញ ដើម្បីឲ្យប្រជាជនឆ្លងកាត់ទាំងទៅទាំងមកដោយថ្មើរជើង ដោយអនុញ្ញាតឲ្យមនុស្សមួយចំនួនដែលមានតម្រូវការខ្លាំងទទួលបានការថែទាំសុខភាព នៅក្នុងប្រទេសអេហ្ស៊ីប។ ប៉ុន្តែនៅមានការងារជាច្រើនទៀតដែលត្រូវធ្វើ។

លោកស្រីបានសង្កត់ធ្ងន់ថា៖ «ត្រូវតែមានលំហូរជំនួយ ការរឹតបន្តឹងលើការផ្គត់ផ្គង់សំខាន់ៗត្រូវតែបន្ធូរបន្ថយ ហើយបុគ្គលិកជំនួយត្រូវតែត្រូវបានអនុញ្ញាតឲ្យចូលធ្វើប្រតិបត្តការ»។

ចំណែកប្រធានគោលនយោបាយការបរទេសរបស់សហភាពអឺរ៉ុប (EU) ក៏បានស្វាគមន៍ ចំពោះការបើកឡើងវិញនូវច្រកព្រំដែន Rafah រវាងតំបន់ហ្កាហ្សា និងប្រទេសអេហ្ស៊ីបនេះដែរ ដោយចាត់ទុកថា ជា «ការទ្រទ្រង់ជីវិត» ដល់ប្រជាជនប៉ាឡេស្ទីនដែលមានជំងឺ និងរបួស នៅក្នុងដែនដីនេះ និងជាជំហានមួយឆ្ពោះទៅមុខនៅក្នុងផែនការសន្តិភាព។

អ្នកការទូតជាន់ខ្ពស់ EU លោកស្រី Kaja Kallas បានបង្ហោះតាមប្រព័ន្ធអ៊ីនធឺណិតថា៖ «ការបើកច្រកព្រំដែន Rafah គឺជាជំហានជាក់ស្តែង និងវិជ្ជមានមួយ នៅក្នុងផែនការសន្តិភាព»។

លោកស្រីបានសរសេរបន្ថែមថា៖ «បេសកកម្មស៊ីវិលរបស់សហភាពអឺរ៉ុប គឺស្ថិតនៅលើដីជាក់ស្ដែង ដើម្បីតាមដានប្រតិបត្តិការឆ្លងកាត់ និងគាំទ្រឆ្មាំព្រំដែនប៉ាឡេស្ទីន»៕