ក្រុមមន្ត្រីអ៊ីរ៉ង់ និងសហរដ្ឋអាមេរិក បានប្រាប់សារព័ត៌មាន Reuters កាលពីថ្ងៃចន្ទដើមសប្ដាហ៍នេះថា អ៊ីរ៉ង់ និងសហរដ្ឋអាមេរិក នឹងបន្តកិច្ចចរចានុយក្លេអ៊ែរនៅថ្ងៃសុក្រសប្ដាហ៍នេះនៅប្រទេសទួរគី ហើយប្រធានាធិបតីអាមេរិកលោក Donald Trump បានព្រមានថា ទន្ទឹមនឹងនាវាចម្បាំងធំៗរបស់សហរដ្ឋអាមេរិកកំពុងធ្វើដំណើរទៅកាន់ប្រទេសអ៊ីរ៉ង់ រឿងអាក្រក់ទំនងជានឹងកើតឡើងប្រសិនបើកិច្ចព្រមព្រៀងមិនអាចសម្រេចបាន។

បេសកជនពិសេសអាមេរិកលោក Steve Witkoff និងរដ្ឋមន្ត្រីការបរទេសអ៊ីរ៉ង់លោក Abbas Araqchi នឹងជួបគ្នានៅទីក្រុងអ៊ីស្តង់ប៊ុលក្នុងកិច្ចខិតខំប្រឹងប្រែងដើម្បីស្រោចស្រង់ឡើងវិញខាងច្រកការទូតលើជម្លោះដ៏យូរអង្វែងអំពីកម្មវិធីនុយក្លេអ៊ែររបស់អ៊ីរ៉ង់ និងបំបាត់ការភ័យខ្លាចនៃសង្គ្រាមថ្មីក្នុងតំបន់ ខណៈមន្ត្រីការទូតក្នុងតំបន់មួយរូបបាននិយាយថា តំណាងមកពីប្រទេសដូចជាអារ៉ាប៊ីសាអ៊ូឌីត និងអេហ្ស៊ីប ក៏នឹងចូលរួមផងដែរ។

ភាពតានតឹងកំពុងកើនឡើងខ្លាំងស្របពេលការបង្កើនកងទ័ពជើងទឹកអាមេរិកនៅជិតមាត់ទ្វារផ្ទះរបស់អ៊ីរ៉ង់ បន្ទាប់ពីការបង្ក្រាបដោយហិង្សាលើបាតុកម្មប្រឆាំងរដ្ឋាភិបាលកាលពីខែមុន ដែលជាភាពចលាចលក្នុងស្រុកដ៏សាហាវបំផុតនៅប្រទេសអ៊ីរ៉ង់ចាប់តាំងពីបដិវត្តន៍ឆ្នាំ ១៩៧៩របស់ខ្លួន។

លោក Trump ដែលបានបញ្ឈប់ការគំរាមធ្វើអន្តរាគមន៍ក្នុងអំឡុងពេលបង្ក្រាបនោះ បានទាមទារឱ្យទីក្រុងតេអេរ៉ង់ធ្វើសម្បទាននុយក្លេអ៊ែរ និងបានបញ្ជូនកងនាវាទៅកាន់ឆ្នេរសមុទ្ររបស់ប្រទេសនេះ។ លោកបាននិយាយកាលពីសប្តាហ៍មុនថា អ៊ីរ៉ង់កំពុង «និយាយយ៉ាងម៉ត់ចត់» ខណៈមន្ត្រីសន្តិសុខជាន់ខ្ពស់របស់ទីក្រុងតេអេរ៉ង់ លោក Ali Larijani បាននិយាយថា ការរៀបចំសម្រាប់ការចរចាកំពុងដំណើរការ។

នៅពេលសួរកាលពីថ្ងៃចន្ទ២មករា សប្ដាហ៍នេះ អំពីលទ្ធភាពនៃកិច្ចព្រមព្រៀង លោក Trump បានប្រាប់ក្រុមអ្នកសារព័ត៌មាននៅសេតវិមានថា កិច្ចចរចាកំពុងកើតឡើងហើយ៕