អូឡាំពិក៖ គណៈកម្មាធិការជាតិអូឡាំពិកកម្ពុជា (NOCC) និងសហព័ន្ធកីឡាជាតិបានទទួលការឧបត្ថម្ភកុំព្យូទ័រចំនួន ៤៥គ្រឿងពីក្រុមហ៊ុនឆ្នោតកីឡាជាតិសម្រាប់បម្រើការងាររដ្ឋបាល ពិសេសអនុវត្តផែនការឆ្ពោះទៅស៊ីហ្គេមឆ្នាំ២០២៣ នៅកម្ពុជា។ ពិធីប្រគល់-ទទួលនេះបានធ្វើឡើងក្រោមវត្តមានឯកឧត្តម វ៉ាត់ ចំរើន អគ្គលេខាធិការ NOCC កាលពីថ្ងៃទី១៥ ខែមីនា ឆ្នាំ២០២២ ម្សិលមិញ។
ឯកឧត្តម វ៉ាត់ ចំរើន មានប្រសាសន៍ថា កុំព្យូទ័រទទួលបានការឧបត្ថម្ភនេះមានតម្លៃសរុបប្រមាណ ២ម៉ឺនដុល្លារសម្រាប់ឧបត្ថម្ភដល់សហព័ន្ធកីឡាជាតិមួយចំនួនដែលខ្វះខាត ក៏ដូចជាគណៈកម្មាធិការជាតិអូឡាំពិកកម្ពុជា សម្រាប់បម្រើការងាររដ្ឋបាលផ្សេងៗ អំឡុងដំណើរការរៀបចំការប្រកួតកីឡាស៊ីហ្គេមឆ្នាំ២០២៣។ ឯកឧត្តមបានចាត់ទុកការឧបត្ថម្ភនេះ គឺជាការរួមចំណែកដ៏សំខាន់ពីវិស័យឯកជន ដើម្បីគាំទ្រវិស័យកីឡាជាតិ ពិសេសក្នុងដំណើរការរៀបចំស៊ីហ្គេមឆ្នាំ២០២៣ ស្របតាមយុទ្ធសាស្ដ្រ “សន្សំសំចៃ តែផ្ដល់នូវភាពអស្ចារ្យដល់ព្រឹត្តិការណ៍ប្រកួត” ដែលគណៈកម្មាធិការជាតិ CAMSOC បានដាក់ចេញក្នុងមហាសន្និបាតកាលពីថ្មីៗ។ រដ្ឋលេខាធិការក្រសួងទេសចរណ៍ដដែលបន្ដថា កុំព្យូទ័រទទួលបានពីការឧបត្ថម្ភនេះ NOCC នឹងផ្ដល់ជូនដល់សហព័ន្ធកីឡាជាតិទាំងអស់ ដែលជាប់ក្នុងការជ្រើសរើសពេញសិទ្ធិសម្រាប់ការប្រកួតកីឡាស៊ីហ្គេម។
ឯកឧត្តមសង្ឃឹមថា ក្រោយទទួលបានសម្ភារៈ សហព័ន្ធកីឡាជាតិនឹងប្រើប្រាស់ជាប្រយោជន៍រួម សម្រាប់បម្រើការងាររដ្ឋបាល ការរក្សាទិដ្ឋន័យ និងឯកសារផ្សេងៗទុកជាកេរដំណែលក្រោយចប់ស៊ីហ្គេមឆ្នាំ២០២៣។ លោកស្រី Chen Mengling អគ្គនាយិកាក្រុមហ៊ុនឆ្នោតកីឡាជាតិបានសម្ដែងនូវសេចក្ដីរីករាយ ដែលរួមចំណែកជាមួយគណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិក្នុងការអភិវឌ្ឍវិស័យកីឡាជាតិ ពិសេសគាំទ្រដំណើរឆ្ពោះទៅស៊ីហ្គេមឆ្នាំ២០២៣ ហើយលោកស្រីជឿជាក់យ៉ាងមុតមាំថា ក្រុមហ៊ុននឹងបន្ដដំណើរជាមួយ NOCC និងវិស័យកីឡាជាតិជាយូរអង្វែងបន្ដទៀតផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
