ក្រសួងសន្តិសុខមាតុភូមិអាមេរិកបាននិយាយកាលពីថ្ងៃចន្ទ២កុម្ភៈសប្ដាហ៍នេះ ថា មន្ត្រីសហព័ន្ធនៅទីក្រុង Minneapolis នឹងត្រូវបានបំពាក់ដោយកាមេរ៉ាសុវត្ថិភាពនៅលើខ្លួន បន្ទាប់ពីការបាញ់សម្លាប់បាតុករពីរនាក់ដោយភ្នាក់ងារអន្តោប្រវេសន៍អាមេរិក។

ចំណាត់ការពីរដ្ឋមន្ត្រីក្រសួងសន្តិសុខមាតុភូមិលោកស្រី Krisi Noem បានកើតឡើងខណៈក្រុមប្រជាធិបតេយ្យអំពាវនាវឱ្យមានការផ្លាស់ប្តូរឧបករណ៍នេះ និងកំណែទម្រង់ផ្សេងទៀតចំពោះការអនុវត្តច្បាប់អន្តោប្រវេសន៍ ដោយរារាំងមូលនិធិសហព័ន្ធដើម្បីជំរុញការទាមទាររបស់ពួកគេ។ 

រដ្ឋាភិបាលសហរដ្ឋអាមេរិកកំពុងបិទទ្វារដោយផ្នែក បន្ទាប់ពីការបរាជ័យក្នុងការចរចាលើកញ្ចប់ចំណាយ ស្របពេលមានការផ្ទុះកំហឹងពីក្រុមប្រជាធិបតេយ្យចំពោះការសម្លាប់បាតុករពីរនាក់ ដែលពលរដ្ឋទាំងពីរនាក់ រស់នៅក្នុងទីក្រុង Midwestern។

លោកស្រី Noem និយាយនៅលើបណ្ដាញសង្គម X ថា ដោយតម្រូវឲ្យចូលជាធរមានភាពភ្លាមៗ ពួកលោកស្រីកំពុងបំពាក់កាមេរ៉ាសុវត្ថិភាពលើមន្ត្រីគ្រប់រូបនៅក្នុងវិស័យនេះនៅទីក្រុង Minneapolis។

លោកស្រីបានបន្ថែមថា ដោយសារមូលនិធិមាន វិធានការកាមេរ៉ាសុវត្ថិភាពនឹងត្រូវបានពង្រីកទូទាំងប្រទេស។

បីថ្ងៃបន្ទាប់ពីការបិទទ្វាររដ្ឋាភិបាលដោយផ្នែក ក្រុមអ្នកប្រជាធិបតេយ្យក្នុងសភាចង់បានការផ្លាស់ប្តូរចំពោះរបៀបដែលក្រសួងសន្តិសុខមាតុភូមិធ្វើសម្រាប់ការបោសសម្អាតអន្តោប្រវេសន៍របស់ខ្លួន ដូចជាការដាក់ពង្រាយកងកម្លាំងប្រដាប់ដោយអាវុធ ម៉ាស់ និងមិនស្គាល់អត្តសញ្ញាណជាច្រើន ដែលជួនកាលឃុំខ្លួនមនុស្សដោយគ្មានដីកា មុនពេលបោះឆ្នោតលើកញ្ចប់ចំណាយ។

កាមេរ៉ាថតជាប់ខ្លួនគឺជាផ្នែកមួយនៃការទាមទាររបស់ក្រុមអ្នកប្រជាធិបតេយ្យ ក៏ដូចជាការហាមប្រាមពាក់ម៉ាស់ និងការទាមទារឲ្យមានដីកាតុលាការមុនពេលចាប់ខ្លួន និងឃុំខ្លួនមនុស្ស៕