ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទថា ម៉ិកស៊ិកនឹងឈប់បញ្ជូនប្រេងទៅកាន់ប្រទេសគុយបា ខណៈលោកបានបង្កើនយុទ្ធនាការដាក់សម្ពាធលើប្រទេសតំបន់សមុទ្រការ៉ាអ៊ីបមួយនេះ។

លោក Trump បានប្រាប់អ្នកសារព័ត៌មាននៅការិយាល័យ Oval នៃសេតវិមានថា ម៉ិកស៊ិកនឹងឈប់បញ្ជូនប្រេងទៅកាន់ប្រទេសគុយបា។ អាជ្ញាធរប្រទេសម៉ិកស៊ិក មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

ម៉ិកស៊ិកគឺជាអ្នកផ្គត់ផ្គង់ប្រេងធំបំផុតតែមួយគត់ទៅកាន់ប្រទេសគុយបាជាប្រទេសដែលតែងតែទទួលរងនូវការខ្វះថាមពល និងការដាច់ចរន្តអគ្គិសនីច្រើន។

ប្រទេសគុយបា ពឹងផ្អែកយ៉ាងខ្លាំងទៅលើការនាំចូលប្រេងឥន្ធនៈនៃផលិតផលចម្រាញ់រួច ដើម្បីបំពេញតម្រូវការរបស់ខ្លួនសម្រាប់ការផលិតអគ្គិសនី ប្រេងសាំង និងប្រេងឥន្ធនៈផ្នែកអាកាសចរណ៍។

ទណ្ឌកម្មរបស់សហរដ្ឋអាមេរិក និងវិបត្តិសេដ្ឋកិច្ចដ៏ជ្រៅ បានរារាំងរដ្ឋាភិបាលកុម្មុយនិស្តពីការទិញប្រេងឥន្ធនៈឲ្យបានគ្រប់គ្រាន់រយៈពេលជាច្រើនឆ្នាំមកហើយ ដែលបង្ខំឱ្យប្រទេសនេះពឹងផ្អែកលើក្រុមសម្ព័ន្ធមិត្ត។