ប្រជាជនម្ចាស់ឆ្នោតនៅទីក្រុងបាងកក បានប្រាប់ទីភ្នាក់ងារសារព័ត៌មានរ៉យទ័រថា ពួកគេសង្ឃឹមថានឹងមើលឃើញការផ្លាស់ប្តូរនៅក្នុងរដ្ឋាភិបាលថ្មី ហើយក៏បារម្ភយ៉ាងខ្លាំងអំពីអស្ថិរភាពនយោបាយ នៅពេលដែលប្រទេសថៃ កំពុងឆ្ពោះទៅរកការបោះឆ្នោតទូទាំងប្រទេសនៅថ្ងៃអាទិត្យ ទី៨ ខែកុម្ភៈ ចុងសប្ដាហ៍នេះ ខណៈការបង្កើតរដ្ឋាភិបាលថ្មី ត្រូវបានរំពឹងថា នឹងពឹងផ្អែកលើការចរចាក្រោយបោះឆ្នោត ដែលអាចនាំទៅដល់ភាពជាប់គាំង និងអស្ថិរភាពនយោបាយដ៏ចម្រូងចម្រាស។

ការបោះឆ្នោតខែកុម្ភៈនេះ បានឈានដល់ការប្រណាំងប្រជែងរវាងបក្សនយោបាយចំនួនបី គឺគណបក្សភូមិចៃថៃ អភិរក្សនិយមរបស់លោកនាយករដ្ឋមន្រ្តីចាំផ្ទះ Anutin Charnvirakul គណបក្សភឿថៃ ដែលជាអតីតបក្សកាន់អំណាច និងគណបក្សប្រជាជនថៃ ដែលជាក្រុមកំណែទម្រង់។ លោក Natthaphong Ruengpanyawut មេដឹកនាំបក្សប្រជាជនថៃ បាននាំមុខគេនៅក្នុងការស្ទង់មតិចុងខែមករា ដោយបានគូសបញ្ជាក់ពីបញ្ហាប្រឈមដ៏លំបាកខ្លាំងសម្រាប់លោក Anutin ដើម្បីរក្សាអំណាចរបស់ខ្លួន។

សាស្ត្រាចារ្យវិទ្យាសាស្ត្រនយោបាយមួយរូបនៅសាកលវិទ្យាល័យ Chulalongkorn បាននិយាយថា ការបង្កើតរដ្ឋាភិបាលបន្ទាប់នឹងអាស្រ័យលើការចរចាក្រោយការបោះឆ្នោត ដោយសារតែជំហរនយោបាយ និងមនោគមវិជ្ជាខុសគ្នា ដែលមានន័យថា ភាពជោគជ័យនៃការបោះឆ្នោត មិនបានធានានូវសមត្ថភាពរបសបក្សមួយក្នុងការបង្កើតរដ្ឋាភិបាលចម្រុះនោះទេ។

អ្នកបោះឆ្នោតនៅទីក្រុងបាងកក បានប្រាប់សារព័ត៌មានរ៉យទ័រថា ភាពមិនប្រាកដប្រជាបានធ្វើឱ្យពួកគេមានការព្រួយបារម្ភយ៉ាងខ្លាំងអំពីអស្ថិរភាពនយោបាយ ដោយនិយាយថា ការបោះឆ្នោតកន្លងមក តែងតែមិនបាននាំមកនូវរដ្ឋាភិបាលមួយដែលច្បាស់លាស់ ឬនៅស្ថិតស្ថេរបានយូរនោះទេ៕