គ្រួសាររាប់លាននៅក្នុងជំរំភៀសខ្លួនក្នុងប្រទេសយេម៉ែន កំពុងទប់ទល់ទៅនឹងស្ថានភាពត្រជាក់ខ្លាំងនៅក្នុងតង់ដែលផ្តល់ការការពារតិចតួចក្នុងពេលរដូវរងាត្រជាក់ខ្លាំងបំផុតរបស់ប្រទេសក្នុងរយៈពេលប៉ុន្មានឆ្នាំចុងក្រោយនេះ ហើយជំនួយអន្តរជាតិខ្វះការផ្គត់ផ្គង់ រាល់ថ្ងៃនៃទុក្ខលំបាកក្លាយជាសមរភូមិថ្មីក្នុងការតស៊ូដើម្បីរស់។

នៅក្នុងតង់រហែកក្នុងជំរំមួយកន្លែងនៅភាគខាងជើងទីក្រុងសាណា អ្នកស្រី Safiya រស់នៅជាមួយក្រុមគ្រួសាររបស់នាងមានសមាជិក១៨នាក់ ដោយទីជម្រកមិនអាចទប់ខ្យល់ឬរារាំងភ្លៀងបានឡើយ ហើយសីតុណ្ហភាពធ្លាក់ចុះនៅពេលយប់បានបន្ថែមទុក្ខលំបាកកាន់តែខ្លាំង។

គ្រួសារដែលបានភៀសខ្លួនដើម្បីស្វែងរកទីសុវត្ថិភាព ពេលនេះប្រឈមនឹងជំងឺផ្តាសាយ។ អ្នកស្រី Safiya ជាម្តាយភៀសខ្លួន បាននិយាយថា យើងរងទុក្ខលំបាកដោយសារភាពត្រជាក់ និងភ្លៀងធ្លាក់។ ប្រសិនបើមានភ្លៀងធ្លាក់ តង់ និងផ្នែកខាងក្នុងនឹងរងផលប៉ះពាល់។ ខ្ញុំមានកូនៗដែលមិនអាចទ្រាំទ្របានហើយអាចនឹងស្លាប់ដោយសារតែត្រជាក់ខ្លាំង ដូច្នេះខ្ញុំដណ្តប់ឲ្យពួកគេដោយថង់ប្លាស្ទិកនៅពេលភ្លៀងធ្លាក់និងត្រជាក់ខ្លាំង។ ពេលខ្លះកន្លែងដេកបានត្រាំក្នុងទឹក។ កន្លែងដែលយើងអង្គុយបានលិចទឹក ហើយកន្លែងដេកនិងភួយក៏សើមអស់។ ជាមួយគ្នានេះ យើងក៏រងទុក្ខលំបាកដោយសារទេភាពស្រេកឃ្លាន និងជំងឺផងដែរ។

ទីភ្នាក់ងារមនុស្សធម៌បាននិយាយថា ប្រជាជនភាគច្រើនដែលភៀសខ្លួននៅក្នុងប្រទេសចំនួន ៤,៥ លាននាក់របស់ប្រទេសយេម៉ែនកំពុងរស់នៅក្នុងជំរំដោយគ្មានសម្លៀកបំពាក់រដូវរងាគ្រប់គ្រាន់ គ្មានភួយ ឬទីជម្រកសមរម្យ។ របាយការណ៍បង្ហាញថា ស្ថានភាពកំពុងកាន់តែយ៉ាប់យ៉ឺននៅក្នុងជំរំចំនួន៤៥កន្លែង នៅទូទាំងខេត្តចំនួន១២ ដោយមានរបាយការណ៍អំពីអ្នកស្លាប់ ជាពិសេសក្នុងចំណោមកុមារ និងមនុស្សចាស់។