មនុស្សម្នាក់បានស្លាប់ និង ៨នាក់ រងរបួស ដោយការវាយប្រហាររបស់អ៊ីស្រាអែល នៅភាគខាងជើង និងខាងត្បូងនៃទន្លេ Litani កាលពីថ្ងៃចន្ទ ខណៈដែលអរិភាពប្រឆាំងនឹងលីបង់ កាន់តែខ្លាំងឡើង។ អាជ្ញាធរអ៊ីស្រាអែល បាននិយាយថា ការវាយប្រហារទាំងនោះ បានកំណត់គោលដៅទៅលើ «ហេដ្ឋារចនាសម្ព័ន្ធយោធារបស់ក្រុមហេសបូឡា» ប៉ុន្តែតំបន់លំនៅឋាន ក៏ត្រូវបានវាយប្រហារផងដែរ ដែលបានបណ្តាលឲ្យខូចខាតដល់អគារ និងសង្កាត់មួយចំនួន។

ការកើនឡើងភាពតានតឹងនេះ បានកើតឡើង ចំពេលមានរបាយការណ៍ថា កងកម្លាំងអ៊ីស្រាអែល បាន     បាចសារធាតុគីមី នៅក្នុងតំបន់តាមបណ្តោយខ្សែបន្ទាត់ពណ៌ខៀវ (Blue Line) ដែលបំបែកលីបង់ពីអ៊ីស្រាអែល រួមទាំងដីកសិកម្មលីបង់ ដែលជំរុញឲ្យមានការថ្កោលទោសពីកងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) និងក្រសួងបរិស្ថានលីបង់។

ក្រសួងបានពិពណ៌នាអំពីហេតុការណ៍នេះថា ជា «ការបំផ្លាញបរិស្ថានដែលមានគោលបំណងបង្កឲ្យប៉ះពាល់ដល់ភាពធន់របស់ប្រជាជនលីបង់ភាគខាងត្បូង»

នៅក្នុងការវាយប្រហារមួយកាលពីថ្ងៃចន្ទ យានដ្រូនអ៊ីស្រាអែលមួយគ្រឿង បានវាយប្រហាររថយន្តមួយគ្រឿង នៅក្នុងទីក្រុង Ansariyeh ក្នុងតំបន់ Zahrani នៃស្រុក Sidon ហើយបានសម្លាប់មេបញ្ជាការប្រចាំតំបន់របស់ក្រុមហេសបូឡា គឺលោក Abbas Ghadboun។ នេះបើយោងតាមសារពីក្រុមនេះដែលបានប្រកាស និងកាន់ទុក្ខការស្លាប់របស់លោក។

ក្រសួងសុខាភិបាលលីបង់ បាននិយាយថា ជនស៊ីវិល ៤នាក់ បានរងរបួស ក្នុងអំឡុងពេលហេតុការណ៍នេះ។ អ៊ីស្រាអែលបាននិយាយថា ប្រតិបត្តិការរបស់ខ្លួននៅក្នុងតំបន់នោះ បានកំណត់គោលដៅទៅលើ     «ក្រុមភេរវករហេសបូឡា»៕