ក្រសួងកិច្ចការផ្ទៃក្នុងរបស់ប្រទេសជប៉ុន បាននិយាយកាលពីថ្ងៃចន្ទ (២ កុម្ភៈ) ថា ចំនួនមនុស្សដែលបានបោះឆ្នោតមុនថ្ងៃកំណត់ សម្រាប់ការបោះឆ្នោតសភាជាន់ទាបនាពេលខាងមុខនេះ មានចំនួនលើសពី ៤,៥លាននាក់ រវាងថ្ងៃពុធ និងថ្ងៃអាទិត្យសប្តាហ៍មុន ដែលស្មើនឹង ៤,៤១% នៃអ្នកបោះឆ្នោតដែលបានចុះឈ្មោះទាំងអស់។

ចំនួនអ្នកចេញទៅទម្លាក់សន្លឹកឆ្នោតមុនថ្ងៃកំណត់ សម្រាប់ការបោះឆ្នោតថ្ងៃទី៨ ខែកុម្ភៈ ចុងសប្ដាហ៍នេះ គឺតិចជាងរយៈពេលដូចគ្នាក្នុងការបោះឆ្នោតឆ្នាំ២០២៤ ប្រហែល ២,៥% សម្រាប់សភាជាន់ទាបដ៏សំខាន់បំផុតនៃសភាជប៉ុន។ អាកាសធាតុរដូវរងាដ៏អាក្រក់ ដូចជាព្រិលធ្លាក់ខ្លាំង បានរួមចំណែកដល់ចំនួនអ្នកចេញទៅបោះឆ្នោតយឺតយ៉ាវបែបនេះ។

ការស្ទង់មតិមួយដោយកាសែត Asahi បានបង្ហាញថា គណបក្សប្រជាធិបតេយ្យសេរីនិយមដែលកំពុងកាន់អំណាច របស់នាយករដ្ឋមន្ត្រីជប៉ុន លោកស្រី Sanae Takaichi ទំនងជាទទួលបានជ័យជម្នះយ៉ាងលើសលប់នៅក្នុងការបោះឆ្នោតសភាជាន់ទាបខាងមុខ។

ក្រុមចម្រុះកាន់អំណាចរបស់លោកស្រី Takaichi បច្ចុប្បន្នកាន់កាប់សំឡេងភាគច្រើនយ៉ាងស្ដួចស្ដើងនៅក្នុងសភាជាន់ទាបដ៏មានឥទ្ធិពល ប៉ុន្តែមានសំឡេងភាគតិចនៅក្នុងសភាជាន់ខ្ពស់។ នាយករដ្ឋមន្ត្រីរូបនេះបានរំលាយសភាកាលពីខែមុន ហើយបានអំពាវនាវឱ្យមានការបោះឆ្នោតមុនអាណត្តិនៅថ្ងៃទី៨ ខែកុម្ភៈ ដោយស្វះស្វែងរកអាណត្តិដ៏រឹងមាំមួយសម្រាប់ការជំរុញរបស់លោកស្រី ក្នុងការធ្វើឱ្យសេដ្ឋកិច្ចមានភាពប្រសើរឡើងវិញ ជាមួយនឹងគោលនយោបាយសារពើពន្ធបែបពង្រីករបស់ខ្លួន៕