ទីភ្នាក់ងារសារព័ត៌មានរដ្ឋ TASS របស់រុស្ស៊ី បានរាយការណ៍ដោយដកស្រង់សម្ដីមន្ត្រីជាន់ខ្ពស់ផ្នែកគ្រប់គ្រងអាវុធរបស់រុស្ស៊ី នៅថ្ងៃអង្គារ (៣ កុម្ភៈ) នេះថា ទីក្រុងមូស្គូ បានត្រៀមខ្លួនរួចជាស្រេចហើយ សម្រាប់ការពិតថ្មីនៃពិភពលោកមួយដែលពុំមានដែនកំណត់នៃការគ្រប់គ្រងអាវុធនុយក្លេអ៊ែរ បន្ទាប់ពីកិច្ចព្រមព្រៀងនុក្លេអ៊ែរ New START ជាមួយអាមេរិក ផុតកំណត់នៅក្នុងសប្តាហ៍នេះ។

ប្រសិនបើទីក្រុងមូស្គូ និងទីក្រុងវ៉ាស៊ីនតោន ពុំបានឈានដល់ការយោគយល់គ្នាទ្វេភាគីនៅនាទីចុងក្រោយណាមួយទេ នោះសន្ធិសញ្ញា New START ដែលបានចុះហត្ថលេខាក្នុងឆ្នាំ២០១០ ដោយអតីតប្រធានាធិបតីអាមេរិក លោក Barack Obama និងអតីតប្រធានាធិបតីរុស្ស៊ី លោក Dmitry Medvedev នឹងផុតកំណត់នៅថ្ងៃទី៥ ខែកុម្ភៈ ដ៏ឆាប់ខាងមុខនេះ។

លោក Sergei Ryabkov អនុរដ្ឋមន្ត្រីការបរទេសរុស្ស៊ី និងជាមន្ត្រីជាន់ខ្ពស់ផ្នែកគ្រប់គ្រងអាវុធ បាននិយាយថា «កង្វះចម្លើយក៏ជាចម្លើយមួយដែរ» ដោយសំដៅលើអវត្តមាននៃការឆ្លើយតបពីទីក្រុងវ៉ាស៊ីនតោន លើសំណើរបស់រុស្ស៊ី ដើម្បីពង្រីកដែនកំណត់នៃកិច្ចព្រមព្រៀង New START។ មន្រ្តីជាន់ខ្ពស់រូបនេះសង្កត់ធ្ងន់ថា រុស្ស៊ីត្រៀមខ្លួនរួចជាស្រេចសម្រាប់ការពិតថ្មីដែលថា មហាអំណាចនុយក្លេអ៊ែរធំជាងគេទាំងពីររបស់ពិភពលោក ពុំមានដែនកំណត់ជាលើកដំបូងបំផុតក្នុងពេលជាច្រើនទសវត្សរ៍មកនេះ។

កិច្ចព្រមព្រៀងនេះបានដាក់កំហិតអាមេរិក និងរុស្ស៊ី មិនឱ្យពង្រាយក្បាលគ្រាប់នុយក្លេអ៊ែរលើសពី ១.៥៥០គ្រាប់ឡើយ លើយានដឹកជញ្ជូនចំនួន ៧០០គ្រឿង - គិតទាំងមីស៊ីល យន្តហោះទម្លាក់គ្រាប់បែក និងនាវាមុជទឹក។ អ្នកតស៊ូមតិខាងគ្រប់គ្រងអាវុធ បារម្ភថា មហាអំណាចនុយក្លេអ៊ែរធំជាងគេទាំងពីររបស់ពិភពលោកគឺអាមេរិក និងរុស្ស៊ី នឹងចាប់ផ្តើមពង្រាយក្បាលគ្រាប់យុទ្ធសាស្ត្រលើសពីដែនកំណត់នៃកិច្ចព្រមព្រៀង បន្ទាប់ពីសន្ធិសញ្ញានេះផុតកំណត់នៅថ្ងៃទី៥ ខែកុម្ភៈ ខាងមុខនេះ ដែលជំរុញឱ្យមានការសឹករិចរិលនៃរបបគ្រប់គ្រងអាវុធសកល៕