កាសែត Financial Times បានរាយការណ៍នៅថ្ងៃអង្គារ (៣ កុម្ភៈ) ដោយដកស្រង់សម្តីប្រភពដែលដឹងពីការពិភាក្សានេះថា អ៊ុយក្រែន បានព្រមព្រៀងជាមួយដៃគូលោកខាងលិចថា ការរំលោភបំពានជាបន្តបន្ទាប់របស់រុស្ស៊ី លើកិច្ចព្រមព្រៀងឈប់បាញ់ណាមួយនាពេលអនាគត នឹងទទួលបានការឆ្លើយតបផ្នែកយោធាដែលមានការសម្របសម្រួលពីអឺរ៉ុប និងសហរដ្ឋអាមេរិក។

របាយការណ៍បានឱ្យដឹងថា ផែនការនេះត្រូវបានពិភាក្សាជាច្រើនលើកច្រើនសារមកហើយនៅក្នុងខែធ្នូ ឆ្នាំមុន និងខែមករា ឆ្នាំនេះ រវាងក្រុមមន្ត្រីអ៊ុយក្រែន អឺរ៉ុប និងអាមេរិក ហើយនឹងពាក់ព័ន្ធនឹងការឆ្លើយតបច្រើនកម្រិត ចំពោះការបំពានបទឈប់បាញ់ណាមួយដែលបានព្រមព្រៀងគ្នាដោយរុស្ស៊ី។

របាយការណ៍បាននិយាយទៀតថា យោងតាមសំណើនេះ ការរំលោភបំពានលើបទឈប់បាញ់ណាមួយពីសំណាក់ភាគីរុស្ស៊ី នឹងជំរុញឱ្យមានការឆ្លើយតបក្នុងរយៈពេល ២៤ម៉ោង ដោយចាប់ផ្តើមជាមួយនឹងការព្រមានការទូត និងប្រសិនបើចាំបាច់ ចាត់វិធានការដោយកងទ័ពអ៊ុយក្រែន ដើម្បីបញ្ឈប់ការរំលោភបំពាន។

របាយការណ៍បន្តថា ប្រសិនបើអរិភាពនៅតែបន្តហួសពីនោះ សំណើនេះនឹងឈានទៅដំណាក់កាលទីពីរនៃអន្តរាគមន៍ដោយប្រើកម្លាំង ចេញពីអ្វីដែលហៅថាសម្ព័ន្ធភាពនៃឆន្ទៈ ដែលរួមមានសមាជិកសហភាពអឺរ៉ុបជាច្រើន និងចក្រភពអង់គ្លេស ន័រវែស អ៊ីស្លង់ និងទួរគី។ សេចក្ដីរាយការណ៍បានបន្ថែមថា ក្នុងករណីមានការវាយប្រហារកាន់តែទូលំទូលាយ ការឆ្លើយតបដែលមានការសម្របសម្រួលដោយកងកម្លាំងគាំទ្រដោយលោកខាងលិច ដែលក៏រួមបញ្ចូលយោធាអាមេរិកផងដែរនោះ នឹងត្រូវធ្វើឡើងក្នុងរយៈពេល ៧២ម៉ោង បន្ទាប់ពីការបំពានបទឈប់បាញ់ដំបូង៕