ក្រុមការពារតំណែងជើងឯកភ្នំពេញក្រោន រួមជាមួយក្រុមបឹងកេត និងវិសាខា នឹងត្រូវជួបក្រុមថ្នាក់ខេត្តរៀងៗខ្លួន នៅក្នុងវគ្គ ១៦ក្រុមចុងក្រោយ-ជើងទី២ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ ឆ្នាំ២០២៥/២៦ (ថ្នាក់ជាតិ) នាល្ងាចថ្ងៃទី៤ ខែកុម្ភៈ ឆ្នាំ២០២៦ ស្អែកនេះ ដើម្បីកាត់សេចក្ដីក្រុមឡើងទៅវគ្គ ៨ក្រុមចុងក្រោយ(១/៤ផ្ដាច់ព្រ័ត្រ)។

សម្រាប់ភ្នំពេញក្រោន នឹងត្រូវបើកទ្វារផ្ទះ ទទួលក្រុមភ្ញៀវសមាគមកីឡាបាល់ទាត់ខេត្តត្បូងឃ្មុំ វិញម្ដង បន្ទាប់ពីជើងទី១ បានយកឈ្នះក្រៅដី ៣-០ នៅទឹកដីមេមត់ ខេត្តត្បូងឃ្មុំ។ កាលពីជើងទី១ ភ្នំពេញក្រោន បានផ្ដល់ឱកាសដល់កីឡាករថ្មីៗច្រើន ពិសេសកីឡាករវ័យក្មេង និងអ្នកមិនសូវមានឱកាសលេងក្នុងលីគ ហើយជំនួបកាត់សេចក្ដីស្អែកនេះ ក៏ទំនងមិនការប្រែប្រួលដែរ ដ្បិតពួកគេត្រូវត្រៀមកីឡាករសំខាន់ៗ ជួបណាហ្គាវើលដ៏ ក្នុងលីគ នា ៣ថ្ងៃបន្ទាប់។

ចំណែកក្រុមបឹងកេតវិញ នឹងត្រូវជួបក្រុមឡាយអ៊ិនឃីងខេត្តសៀមរាប នៅពហុកីឡដ្ឋានជាតិ(អូឡាំពិក) ក្រោយយកឈ្នះលើក្រុមថ្នាក់ខេត្ដនេះ ៩-០ កាលពីជើងទី១ នៅទឹកដីខេត្តសៀមរាប ស្របពេលក្រុមវិសាខា នឹងត្រូវជួបក្រុមភ្នំពេញហ្គាឡាក់ស៊ី បន្ទាប់ពីយកឈ្នះ ១៣-០ កាលពីជើងទី១ នៅទីលានវិទ្យស្ថានជាតិអប់រំកាយ និងកីឡា ដែលមានចម្ងាយប្រមាណជាង ១គីឡូម៉ែត្រពីគ្នា។

ជាមួយការប្រកួតកាត់សេចក្ដីនាថ្ងៃពុធនេះដែរ ប្រសិនបើក្រុមខ្លាំងទាំង ៣ នៃលីគកំពូលកម្ពុជា បន្ដធ្វើបានល្អ ពួកគេនឹងត្រូវឡើងទៅឈរចាំនៅវគ្គ ៨ក្រុមចុងក្រោយ នៃពានរង្វាន់សម្ដេចតេជោ ហ៊ុន សែន-ថ្នាក់ជាតិ ។ រីឯបេក្ខភាព ៥ក្រុមផ្សេងទៀត ដែលត្រូវឡើងវគ្គ ១/៤ផ្ដាច់ព្រ័ត្រ ត្រូវរង់ចាំការប្រកួតកាត់សេចក្ដីជើងទី២ ក្នុងវគ្គ ១៦ក្រុមចុងក្រោយ នាថ្ងៃទី១១ ខែកុម្ភៈ ឆ្នាំ២០២៦ ខាងមុខ៕ អត្ថបទ លី ឈុនឡា