អ្នកគាំទ្រវ័យក្មេងរាប់ពាន់នាក់ដែលស្លៀកសម្លៀកបំពាក់ពណ៌ទឹកក្រូច បាននាំគ្នាអបអរសាទរការជួបជុំរបស់គណបក្សនយោបាយដ៏ពេញនិយមបំផុតរបស់ប្រទេសថៃ នៅមុនពេលបោះឆ្នោត នាចុងសប្តាហ៍នេះ ប៉ុន្តែមានមនុស្សតិចណាស់ដែលរំពឹងថា ក្រុមនេះនឹងបានឡើងកាន់អំណាច។

ទោះបីជាគណបក្សប្រជាជន (People’s Party) នាំមុខដាច់ឆ្ងាយនៅក្នុងការស្ទង់មតិ ជាមួយនឹងការសន្យាដោះស្រាយអំពើពុករលួយ និងកែទម្រង់ច្បាប់ប្រមាថព្រះមហាក្សត្រដ៏តឹងរ៉ឹងរបស់ប្រទេសក៏ដោយ ក៏សូម្បីសមាជិកសភាមួយចំនួនរបស់គណបក្សនេះ នៅតែមិនប្រាកដក្នុងចិត្តដែរ។ លោកស្រី Rukchanok Srinork អាយុ ៣១ឆ្នាំ បានប្រាប់សារព័ត៌មាន AFP ថា៖ «ពួកគេនឹងមិនអនុញ្ញាតឲ្យយើងក្លាយជារដ្ឋាភិបាល ឬឡើងកាន់អំណាចងាយស្រួលឡើយ។ វាមិនមែនជារឿងគួរឲ្យភ្ញាក់ផ្អើលទេដែលពួកគេនឹងធ្វើអ្វីគ្រប់យ៉ាង ដើម្បីរារាំងពួកយើង»។

គណបក្សប្រជាជន គឺជាតំណាងឲ្យក្រុមទម្រង់ថ្មីបំផុតដែលបានឈ្នះការបោះឆ្នោតចុងក្រោយក្នុងឆ្នាំ២០២៣ ដោយបានធ្វើយុទ្ធនាការជាមួយនឹងការសន្យាថា នឹងបន្ធូរបន្ថយច្បាប់ប្រមាថព្រះមហាក្សត្រ កម្រិតឥទ្ធិពលរបស់យោធា និងលុបបំបាត់ភាពផ្តាច់មុខផ្នែកអាជីវកម្មរបស់អ្នកមានឥទ្ធិពល។

គណបក្សនេះបានឈានដល់កិច្ចព្រមព្រៀងបង្កើតរដ្ឋាភិបាលចម្រុះជាមួយគណបក្សភឿថៃ (Pheu Thai) ដែលឈ្នះលំដាប់ទី២ ជាក្រុមរបស់អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត់ (Thaksin Shinawatra) ដែលឥឡូវនេះកំពុងជាប់ពន្ធនាគារ តែបែរត្រូវបានសមាជិកព្រឹទ្ធសភាតែងតាំងដោយយោធា បដិសេធមិនទទួលយកមេដឹកនាំរបស់បក្សដែលពេលនោះមានឈ្មោះ Move Forward គឺលោក ភីថា លឹមចារ៉ើនរ៉ាត់ (Pita Limjaroenrat) ឲ្យកាន់តំណែងជានាយករដ្ឋមន្ត្រី។

គណបក្សប្រជាជនមានសំឡេងគាំទ្រប្រហែល ១១ភាគរយ នាំមុខលើសគូប្រជែងកៀកបំផុតរបស់ខ្លួន គឺគណបក្សភូមិចៃថៃ (Bhumjaithai) ដែលកំពុងកាន់អំណាច នៅក្នុងការស្ទង់មតិចុងក្រោយដោយស្ថាប័នស្ទង់មតិ NIDA។ ការស្ទង់មតិបានរកឃើញថា ពាក់កណ្តាលនៃយុវជនអាយុពី ១៨ ដល់ ៣៥ឆ្នាំ គាំទ្រគណបក្សនេះ។ ប៉ុន្តែឥទ្ធិពលឥស្សរជនអភិរក្សនិយម នៅតែបន្តក្ដោបក្តាប់អំណាចរបស់ពួកគេលើស្ថាប័នរបស់ថៃ ហើយអ្នកវិភាគភាគច្រើន ជឿជាក់ថា គណបក្សប្រជាជន នឹងមិនអាចបង្កើតរដ្ឋាភិបាលបានឡើយ ទោះបីជាខ្លួនទទួលបានអាសនៈច្រើនបំផុតក៏ដោយ៕