ប្រធានាធិបតីស្ដីទីវ៉េណេស៊ុយអេឡា លោកស្រី Delcy Rodriguez កាលពីថ្ងៃចន្ទ (ទី២ ខែកុម្ភៈ ឆ្នាំ២០២៦) បានពង្រឹងរដ្ឋាភិបាលថ្មីរបស់លោកស្រី ដោយបានតែងតាំងសមាជិកគណៈរដ្ឋមន្ត្រីជាច្រើនរូប និងជួបជាមួយអ្នកការទូតជាន់ខ្ពស់ថ្មីរបស់ទីក្រុងវ៉ាស៊ីនតោន ប្រចាំនៅទីក្រុងការ៉ាកាស ដើម្បីពិភាក្សាពី «ការផ្លាស់ប្តូរ» របស់ប្រទេសនេះ បន្ទាប់ពីមានការទម្លាក់លោក Nicolas Maduro។

លោកស្រី Laura Dogu ភារធារីរបស់ទីក្រុងវ៉ាស៊ីនតោន ប្រចាំវ៉េណេស៊ុយអេឡា បានលើកឡើងនៅលើបណ្ដាញសង្គម X ថា លោកស្រីបានជួបជជែកជាមួយលោកស្រី Rodriguez អំពីផែនការរបស់សហរដ្ឋអាមេរិក ដើម្បីឲ្យមាន «ស្ថិរភាព ការស្តារសេដ្ឋកិច្ច ការផ្សះផ្សា និងការផ្លាស់ប្តូរ»។

ភ្លាមៗ គេមិនច្បាស់នោះទេថា តើលោកស្រី Dogu ចង់មានន័យយ៉ាងណា ចំពោះពាក្យ «ការផ្លាស់ប្តូរ» នេះ។ លោក Maduro បានឡើងកាន់អំណាចតាំងពីឆ្នាំ២០១៣ រហូតដល់កងកម្លាំងអាមេរិក បានវាយឆ្មក់ប្រទេសនេះ ហើយចាប់ខ្លួនលោក ប៉ុន្តែរដ្ឋាភិបាលភាគច្រើនរបស់លោក នៅតែមានសុពលភាព។

រដ្ឋមន្ត្រីការបរទេសវ៉េណេស៊ុយអេឡា លោក Yvan Gil បាននិយាយបន្ទាប់ពីកិច្ចប្រជុំនោះថា ការផ្តោតអារម្មណ៍ផ្នែកការទូតនាពេលខាងមុខ នឹងពាក់ព័ន្ធនឹង «ការដោះស្រាយភាពខុសគ្នា និងភាពចម្រូងចម្រាសជាប្រវត្តិសាស្ត្រ រវាងសហរដ្ឋអាមេរិក និងវ៉េណេស៊ុយអេឡា»។ លោកបានបន្ថែមថា៖ «យើងបានពិនិត្យឡើងវិញនូវរបៀបវារៈរួម ជាពិសេសលើថាមពល ពាណិជ្ជកម្ម និងនយោបាយ»។

បន្ថែមពីលើការជួបជាមួយលោកស្រី Dogu លោកស្រី Rodriguez បានធ្វើការតែងតាំងតួនាទីសំខាន់ៗជាច្រើន នៅក្នុងគណៈរដ្ឋមន្ត្រីប្រធានាធិបតីរបស់លោកស្រី ក្នុងនោះរួមទាំងការតែងតាំងអតីតរដ្ឋមន្ត្រីការបរទេស លោក Felix Plasencia ឲ្យដឹកនាំបេសកកម្មការទូតរបស់វ៉េណេស៊ុយអេឡា នៅសហរដ្ឋអាមេរិកផងដែរ៕