ក្រុមមន្ត្រី នៅថ្ងៃអង្គារ (ទី៣ ខែកុម្ភៈ ឆ្នាំ២០២៦) បានប្រាប់ឲ្យដឹងថា ព្រិលធ្លាក់ខ្លាំងមិនធម្មតា នៅក្នុងប្រទេសជប៉ុន បានរួមចំណែកធ្វើឲ្យមានអ្នកស្លាប់ចំនួន ៣០នាក់ ក្នុងរយៈពេល ២សប្តាហ៍កន្លងមកនេះ ក្នុងនោះរួមមានទាំងស្ត្រីវ័យ ៩១ឆ្នាំម្នាក់ ដែលត្រូវបានគេរកឃើញនៅកប់ក្រោមគំនរព្រិលកម្ពស់ ៣ម៉ែត្រនៅខាងក្រៅផ្ទះរបស់គាត់។

រដ្ឋាភិបាលកណ្តាល បានដាក់ពង្រាយកងទ័ព ដើម្បីជួយប្រជាជននៅតំបន់ Aomori ដែលរងគ្រោះខ្លាំងបំផុត ជាកន្លែងដែលព្រិលកម្ពស់រហូតដល់ ៤,៥ ម៉ែត្រ នៅតែមានពាសពេញដី នៅតំបន់ដាច់ស្រយាលជាច្រើន។

លោកស្រីនាយករដ្ឋមន្ត្រី Sanae Takaichi បានបើកកិច្ចប្រជុំកម្រិតគណៈរដ្ឋមន្ត្រីពិសេសមួយ នាថ្ងៃទី៣ ខែកុម្ភៈនេះ ដើម្បីណែនាំរដ្ឋមន្ត្រីឲ្យធ្វើអ្វីគ្រប់យ៉ាងដែលពួកគេអាចធ្វើបាន ដើម្បីទប់ស្កាត់ការស្លាប់ និងគ្រោះថ្នាក់។

ខ្យល់ត្រជាក់ខ្លាំង បានបណ្តាលឲ្យមានព្រិលធ្លាក់ខ្លាំង នៅតាមបណ្តោយឆ្នេរជប៉ុន ក្នុងរយៈពេលប៉ុន្មានសប្តាហ៍ថ្មីៗនេះ ដោយតំបន់ខ្លះឃើញបរិមាណព្រិលធ្លាក់ច្រើនជាងទ្វេដងនៃបរិមាណធម្មតា។ ហើយបើយោងតាមទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយ បានឲ្យដឹងថា ចាប់តាំងពីថ្ងៃទី២០ ខែមករា ដល់ថ្ងៃទី៣ ខែកុម្ភៈ មនុស្ស ៣០នាក់យ៉ាងតិច បានបាត់បង់ជីវិតដោយសារព្រិលធ្លាក់ខ្លាំង។

អភិបាលតំបន់ Aomori លោក Soichiro Miyashita បាននិយាយកាលបីថ្ងៃទី២ ខែកុម្ភៈថា លោកបានស្នើសុំឲ្យយោធាជប៉ុនផ្តល់ជំនួយសង្គ្រោះបន្ទាន់។ លោកបានប្រាប់ថា លោកបានស្នើសុំឲ្យកងទ័ពជួយមនុស្សចាស់ នៅក្នុងតំបន់ដែលរស់នៅតែម្នាក់ឯង និងត្រូវការជំនួយក្នុងការសម្អាតព្រិល៕