ហ្ស៊កដានីបាននិយាយកាលពីថ្ងៃចន្ទថា ខ្លួននឹងមិនអនុញ្ញាតឲ្យទឹកដី ឬដែនអាកាសរបស់ខ្លួន ត្រូវបានប្រើប្រាស់ ក្នុងជម្លោះក្នុងតំបន់ណាមួយ ឬជា «កន្លែងបាញ់រ៉ូកែត ឬមីស៊ីល» សម្រាប់សកម្មភាពយោធាប្រឆាំងនឹងអ៊ីរ៉ង់ទេ ដោយព្រមានថា ខ្លួននឹងឆ្លើយតបទៅនឹងការរំលោភបំពានណាមួយលើអធិបតេយ្យភាពរបស់  ខ្លួន។

ក្រសួងការបរទេសហ្ស៊កដានី បាននិយាយថា ឧបនាយករដ្ឋមន្ត្រី និងជារដ្ឋមន្ត្រីការបរទេស លោក Ayman Safadi បានធ្វើការអត្ថាធិប្បាយនេះ ក្នុងអំឡុងពេលនៃការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi។

លោក Safadi បានសង្កត់ធ្ងន់ថា ហ្ស៊កដានីនឹងប្រើប្រាស់មធ្យោបាយទាំងអស់ដែលមាន ដើម្បីទប់ទល់នឹងការប៉ុនប៉ងរំលោភលើដែនអាកាសរបស់ខ្លួន ឬគំរាមកំហែងដល់សន្តិសុខរបស់ប្រទេសនេះ និងសុវត្ថិភាពប្រជាពលរដ្ឋរបស់ខ្លួន។

ដោយពិភាក្សាអំពីបញ្ហានុយក្លេអ៊ែរអ៊ីរ៉ង់ លោក Safadi បាននិយាយថា ការទូត និងការសន្ទនា គឺជាផ្លូវតែមួយគត់ដែលអាចសម្រេចបានដំណោះស្រាយ ដោយបញ្ជាក់ជាថ្មីនូវការគាំទ្ររបស់ហ្ស៊កដានីចំពោះកិច្ចខិតខំប្រឹងប្រែងកាត់បន្ថយភាពតានតឹង និងការស្តារឡើងវិញនូវភាពស្ងប់ស្ងាត់ក្នុងតំបន់។ លោកបានបញ្ជាក់ជាថ្មីនូវការបដិសេធរបស់ទីក្រុងអាម៉ាន់ចំពោះការរំលោភបំពានណាមួយលើអធិបតេយ្យភាពរដ្ឋ និងបានអំពាវនាវឲ្យមានការគោរពច្បាប់អន្តរជាតិ។

រដ្ឋមន្ត្រីទាំងពីរ បានព្រមព្រៀងគ្នារក្សាការទំនាក់ទំនង និងការសម្របសម្រួលលើការវិវត្តក្នុងតំបន់ និងកិច្ចខិតខំប្រឹងប្រែងការទូតជាបន្តបន្ទាប់ ដើម្បីកាត់បន្ថយភាពតានតឹង។

ភាពតានតឹងរវាងទីក្រុងតេអេរ៉ង់ និងទីក្រុងវ៉ាស៊ីនតោន នៅតែខ្ពស់ ស្របពេលមានសកម្មភាពយោធាកើនឡើងរបស់សហរដ្ឋអាមេរិក នៅក្នុងតំបន់។ រដ្ឋបាលលោក ត្រាំ បានដាក់ពង្រាយក្រុមវាយប្រហារនាវាផ្ទុកយន្តហោះ និងនាវាចម្បាំងបន្ថែមទៅកាន់មជ្ឈិមបូព៌ា នៅចុងខែមករា៕