ប្រធានាធិបតីអាមេរិក លោក Donald Trump កាលពីថ្ងៃចន្ទ (ទី២ ខែកុម្ភៈ ឆ្នាំ២០២៦) បាននិយាយថា រដ្ឋបាលរបស់លោក អាចទទួលបានដំណឹងល្អខ្លះៗ ក្នុងពេលឆាប់ៗនេះ ជុំវិញដំណើរការជំរុញឲ្យបញ្ចប់សង្គ្រាមជិត ៤ឆ្នាំ ដែលបង្កឡើងដោយការឈ្លានពានរបស់រុស្ស៊ីលើអ៊ុយក្រែន ក្នុងខែកុម្ភៈ ឆ្នាំ២០២២។

លោក Trump បានប្រាប់អ្នកសារព័ត៌មាននៅក្នុងការិយាល័យប្រធានាធិបតី Oval Office ថា៖ «ខ្ញុំគិតថាយើងកំពុងធ្វើការងារបានយ៉ាងល្អប្រសើរជាមួយអ៊ុយក្រែន និងរុស្ស៊ី។ នេះគឺជាលើកទី១ ហើយ ដែលខ្ញុំកំពុងនិយាយដូច្នេះ។ ខ្ញុំគិតថា យើងប្រហែលជានឹងមានដំណឹងល្អខ្លះៗជាមិនខាន»។

គួរបញ្ជាក់ថា បេសកជនទីពីទីក្រុងគីវ មូស្គូ និងវ៉ាស៊ីនតោន នឹងជួបប្រជុំគ្នា នៅទីក្រុង Abu Dhabi របស់ប្រទេសអេមីរ៉ាតអារ៉ាប់រួម នៅថ្ងៃពុធ និងថ្ងៃព្រហស្បតិ៍ សម្រាប់ការចរចាដែលមានគោលបំណងបញ្ចប់សង្គ្រាមនេះ។

មន្ត្រីសេតវិមានម្នាក់បាននិយាយនៅថ្ងៃចន្ទនោះថា បេសកជនពិសេសរបស់លោក Trump គឺលោក Steve Witkoff នឹងធ្វើដំណើរទៅកាន់ទីក្រុង Abu Dhabi សម្រាប់ការចរចានេះ៕