ពេលដែលសង្រ្គាមផ្ទុះឡើង មជ្ឈមណ្ឌលវប្បធម៌អ៊ិស្លាម Muhammad Asad ស្ថិតនៅតំបន់ភាគខាងលិចអ៊ុយក្រែន បានបើកទ្វារស្វាគមន៍មនុស្សជម្លៀសខ្លួនពីទូទាំងប្រទេស ប្រែក្លាយថ្នាក់រៀន និងសាលធ្វើសក្ការៈបូជាទៅជាជម្រកបណ្តោះអាសន្ន ។ ជនមូស្លីមតម្រង់ជួរនៅក្នុងបន្ទប់រៀន ដោយមានពូក ចំណីអាហារឆ្អិនរួច និងទឹកផឹក ។

លោក Ibrahim Zhumabekov គឺជាមេដឹកនំាសាសនាអ៊ិស្លាមវ័យ ២៩ឆ្នាំមួយរូប និយាយថា ព័ត៌មានមិនពិតនៅអ៊ុយក្រែន កំពុងរីករាលដាល រួមទាំងអំណះអំណាងថា មូស្លីមគឺជាភេរវករ ថាជំនឿរបស់ពួកគេធ្វើឲ្យស្ត្រីចុះខ្សោយ ។

ប៉ុន្តែស្របពេលភាពវឹកវរនៅថ្ងៃដំបូងនៃសង្រ្គាម ទស្សនៈទាំងនេះ ត្រូវបានលុបចោល ពេលដែលពលរដ្ឋអ៊ុយក្រែនរាប់រយនាក់ ស្វែងរកភាពស្ងប់ស្ងៀមនៅមជ្ឈមណ្ឌល ហើយក្មេងៗ ត្រូវបានគេផ្តល់កន្លែងស្នាក់នៅសម្រាប់តែស្រ្តី ដើម្បីបានពួកគេសម្រាក និងលុបលាងប្រាណ ។

ពេលដែលបក្សីមានចម្រុះពណ៌តូច ២ក្បាល ហោះលើក្បាល យំចេបៗ លោក Zhumabekov និងលោក Ezzideen el-Yaman វ័យ ៤៦ឆ្នាំ គឺជាភ្ញៀវនៅមជ្ឈមណ្ឌលមកពីប្រទេសលីបង់ នឹកឃើញបុរសអ៊ុយក្រែនម្នាក់ដែលបានមកដល់មជ្ឈមណ្ឌល រួចគោះទ្វារ ពេលដែលគាត់គ្រវាត់ចោលគំនូប្រឆាំងមូស្លីម ។

លោក Zhumabekov និយាយទាំងទឹកមុខញញ្ញឹមញញែមថា ពួកយើងបានអញ្ជើញគាត់ បង្ហាញគាត់នៅជុំវិញខ្លួន ហើយគាត់ក៏បានផ្លាស់ប្តូរចិត្តគំនិតរបស់គាត់ ហើយឥឡូវគាត់មកលេងពួកយើងញឹកញាប់ទៀតផង ។

លោក Zhumabekov និយាយថា ការអប់រំពលរដ្ឋអ៊ុយក្រែនពីកេរតំណែលដ៏សម្បូរបែបរបស់មូស្លីមនៅអ៊ុយក្រែន គឺជារឿងសំខាន់ស្មើភាពគ្នា ដោយលោកកត់សំគាល់ឃើញថា មូស្លីមនៅទីក្រុង Lviv មានតាំងពីសតវត្សរ៍ទី ១៤ មកម្ល៉េះ ។

សូមបញ្ជាក់ថា នៅឆ្នាំ ២០២៤ ជនមូស្លីមប្រហែល ១,៥លាននាក់ រស់នៅក្នុងប្រទេសអ៊ុយក្រែន មុនពេលរុស្ស៊ីប្រកាសដាក់តំបន់គ្រីមៀ ជាឧបសម្ព័ន្ធរបស់ខ្លួន ហើយនិងក្រុមផ្តាច់ខ្លួនគាំទ្រទីក្រុងមូស្គូ រឹបអូសការគ្រប់គ្រងតំបន់មួយចំនួននៅភាគខាងកើតអ៊ុយក្រែន កាលពីឆ្នាំ ២០១៤ ៕