នាយករដ្ឋមន្ត្រីលីបង់ នៅថ្ងៃអង្គារ (ទី៣ ខែកុម្ភៈ ឆ្នាំ២០២៦) នេះ បាននិយាយថា លោកនឹងមិនបណ្ដោយឲ្យប្រទេសរបស់លោក ត្រូវបានអូសចូលទៅក្នុងជម្លោះថ្មីជាដាច់ខាត បន្ទាប់ពីក្រុមហេសបូឡា បានព្រមានថា ការវាយប្រហារណាមួយ លើប្រទេសគាំទ្រខ្លួន គឺអ៊ីរ៉ង់ នឹងជាការវាយប្រហារលើក្រុមនេះ។

អំឡុងកិច្ចប្រជុំកំពូលរដ្ឋាភិបាលពិភពលោក នៅទីក្រុង Dubai ប្រទេសអេមីរ៉ាតអារ៉ាប់រួម ដើម្បីឆ្លើយតបទៅនឹងសំណួរ ពាក់ព័ន្ធនឹងការអត្ថាធិប្បាយដែលធ្វើឡើងដោយប្រមុខក្រុមហេសបូឡា លោក Naim Qassem កាលពីសប្តាហ៍មុន លោក Nawaf Salam បានបញ្ជាក់ថា៖ «យើងនឹងមិនបណ្ដោយឲ្យនរណាម្នាក់អូសប្រទេសនេះចូលទៅក្នុងដំណើរផ្សងព្រេងមួយផ្សេងទៀតជាដាច់ខាត»។

លោក Qassem បានឆ្លើយតបទៅនឹងការគំរាមកំហែងមានវិធានការយោធារបស់អាមេរិក លើអ៊ីរ៉ង់ ដោយនិយាយថា៖ «យើងនឹងជ្រើសរើសនៅពេលនោះថា តើនឹងមានវិធានការយ៉ាងដូចម្ដេច ប៉ុន្តែយើងមិនឈរនៅកណ្ដាលឡើយ»។

លោក Salam បានសង្កត់ធ្ងន់ថា ការសម្រេចចិត្តរបស់ក្រុមហេសបូឡា ក្នុងការចូលរួមក្នុងសង្គ្រាមហ្គាហ្សា ដើម្បីគាំទ្រសម្ព័ន្ធមិត្តរបស់ខ្លួន គឺក្រុមហាម៉ាស ផ្ដល់ផលវិបាក «ធំណាស់» សម្រាប់លីបង់ ហើយថា «គ្មាននរណាម្នាក់មានឆន្ទៈក្នុងការនាំប្រទេសនេះចូលទៅក្នុងដំណើរផ្សងព្រេងប្រភេទនេះទៀតទេ»។

អរិភាពជាង ១ឆ្នាំ រវាងអ៊ីស្រាអែល និងក្រុមហេសបូឡា ដែលភាគច្រើន បានបញ្ចប់ដោយបទឈប់បាញ់ខែវិច្ឆិកា ឆ្នាំ២០២៤ បានធ្វើឲ្យក្រុមនេះចុះខ្សោយយ៉ាងខ្លាំង។ រដ្ឋាភិបាលបានចាប់ផ្តើមអនុវត្តផែនការមួយ ដើម្បីធ្វើឲ្យអាវុធលែងមាននៅតំបន់ភាគខាងត្បូង ដែលជាបន្ទាយដ៏សំខាន់មួយជាប្រពៃណីរបស់ក្រុមហេសបូឡា៕